Dómari hefur vísað frá máli gegn Donald Trump sem snerist um stuld hans á leynilegum skjölum frá forsetatíð hans. Úrskurðurinn kemur á óvart en málið var talið geta haft veruleg áhrif á þá vegferð Trump að hrifsa til sín forsetaembættið að nýju vestra.
Það er skammt stórra högga á milli hjá Donald Trump, fyrrverandi Bandaríkjaforseta. Á laugardaginn lifði hann með naumindum af banatilræði og í dag var málið óþægilega látið niðurfalla. Það gerist á sama tíma og landsþing Repúblikana hefst en fastlega er búist við því að Trump opinberi hvern hann hyggst tilefna sem varaforsetaefni sitt.
Það var alríkisdómarinn Aileen Cannon sem kvað upp úrskurðinn en árið 2020 skipaði Trump sjálfur hana í embætti dómara. Byggðist úrskurður hennar á því að bandaríska dómsmálaráðuneytið hefði ekki haft heimild í lögum til þess að tilnefna Jack Smith, sem sérstakan rannsakanda málsins, og heimila honum að ákæra Trump fyrir hin meintu brot.
Hefur úrskurðurinn vakið talsverða furðu en áður hefur verið reynt á þessa heimild ráðuneyta til þess að tilefna sérstaka rannsakendur og hefur niðurstaðan þá verið sú að það væri samkvæmt lögum.
Búist er við því að úrskurðinum verði áfrýjað til Hæstarétts Bandaríkjanna.
Eins og áður segir snerist málið um leyniskjöl sem Trump tók með sér þegar valdatíð hans í Hvíta húsinu lauk og flutt þau á heimili sitt í Flórída. Er forsetinn fyrrverandi sakaður um að hafa brotið lög um varðveislu ríkisleyndarmáli með þeim gjörðum sínum og hvort að hann hafi reynt að hindra alríkisstjórnina í að endurheimta skjölin.
Frægt varð með endemum þegar alríkislögreglan gerði húsleit á heimili Trump í Flórída en þá hafði hann virt að vettugi tilraunir ríkisskjalasafns Bandaríkjanna til að endurheimta skjölin.
