Íslensk kona á fertugsaldri og fjórir erlendir karlmenn eru ákærð í stóru fíkniefnamáli sem þingfest verður við Héraðsdóm Reykjaness á morgun. Meðal ákærðra eru tveir erlendir bræður í Breiðholtinu, sá yngri verður 17 ára í október en sá eldri er 19 ára.
Málið varðar innflutning á rétt tæplega tveimur kílóum af kókaíni. Voru fíkniefnin falin í tveimur pakkningum inni í tölvuturni sem pakkað var í pappakassa ásamt tölvuskjá, en sendingin kom hingað til lands með hraðsendingafyrirtækinu FedEx frá Bandaríkjunum. Var sendingin stíluð á nafn og heimilisfang aðila sem nýtur nafnleyndar í ákæru málsins.
Fíkniefnin fundust fimmtudaginn 20. júlí við eftirlit tollvarða í aðstöðu tollgæslunnar í vöruhúsi Icetransport að Selhellu 9 í Hafnarfirði og lagði lögreglan hald á fíkniefnin sama dag, rannsakaði þau og skipti þeim út fyrir gerviefni sem komið var fyrir inni í tölvuturninum, ásamt hlustunarbúnaði og kom pakkanum fyrir á starfsstöð Fedex
að Selhellu 9 í Hafnarfirði til afhendingar.
Brotið var framið um mitt síðasta sumar. Höfuðpaurinn í málinu er á þrítugsaldri. Kom hann að skipulagningu innflutningsins og var í samskiptum við óþekkta aðila í gegnum samskiptaforritið Telegram. Hann leiðbeindi hinum sakborningunum varðandi það að sækja og afhenda pakkann. Konan fékk m.a. það hlutverk, gegn peningagreiðslu, að ráða mann til að sækja pakkann á bíl í afgreiðslu FedEx við Selhellu. Fólkið hittist nokkrum sinnum í Mjódd til að skiptast á upplýsingum og peningum, en þar afhenti höfuðpaurinn einum sakborningi peninga til að leysa út pakkann í Selhellu í Hafnarfirði. Fólkið hittist síðan aftur í Mjódd þar sem pakkinn skipti um hendur, en þar handtók lögregla sakborningana, fyrir utan einn sem var handekinn á Klambratúni.
Einn er ákærður fyrir að hafa geymt fíkniefni fyrir höfuðpaurinn í bíl sínum og höfuðpaurinn sjálfur er ákærður fyrir vörslu fíkniefna á heimili sínu.
Höfuðpaurinn í málinu er ákærður fyrir stórfellt fíkniefnasmygl en hitt fólkið er ákært fyrir tilraun til stórfellds fíkniefnabrots. Sem fyrr segir er þingfesting í málinu á morgun og má því búast við að réttarhöldin verði í haust.
