Þýska ríkisstjórnin samþykkti í síðustu viku nýja viðbragðsáætlun sem á að gilda á hættutímum. Í henni er kveðið á um þær aðgerðir sem gripið verður til ef stríð brýst út í Evrópu, annars staðar en í Úkraínu, á næstu árum.
Samkvæmt áætluninni verður herskylda þá tekin upp á nýjan leik en hún var aflögð 2011.
Í fréttatilkynningu frá Nancy Faeser, innanríkisráðherra, segir að ástæðan fyrir því að ný áætlun hefur verið gerð, sé hin aukna ógn sem stafar frá Rússlandi. „Vegna árásargirni Rússa er staða öryggismála í Evrópu gjörbreytt,“ segir hún.
Nýja áætlunin kemur í stað þeirrar sem hefur gilt frá 1989, árinu sem Berlínarmúrinn féll.
Faeser segir að mikilvægt sé að styrkja almannavarnarkerfið í landinu. Til dæmis verða neðanjarðarlestarstöðvar og önnur neðanjarðarrými gerð að loftvarnarbyrgjum og ný aðvörunarkerfi verða þróuð.
Einnig er hugsanlegt að gripið verði til matarskömmtunar og unnið er að undirbúningi þess að koma upp neyðarbirgðum af korni og mat með langan endingartíma.
Meðal annarra ákvæða neyðaráætlunarinnar er að hægt verður að skylda alla 18 ára og eldri í vinnu. Heilbrigðisstarfsfólk getur einnig verið kallað til herþjónustu eða til starfa utan hersins. Þetta gildir einnig um þá sem eru ekki í vinnu.
Fyrirtæki geta verið skikkuð til að breyta framleiðslu sinni yfir í vörur fyrir herinn og sjúkrahúsin verða búin undir að taka við miklu fleiri sjúklingum en venjulega.
