Veðurstofa Íslands hefur uppfært veðurviðvaranir vegna óveðursins í vikunni. Áður var gul viðvörun á öllu landinu en nú hefur verið uppfært í appelsínugula viðvörun í sex landshlutum.
Um er að ræða Norðurland vestra og eystra, Austurland að Glettingi, Austfirðir, Suðausturland og Miðhálendið. Djúp lægð kemur upp að landinu norðaustanverðu með langvinnu roki og úrkomu, bæði rigningu og jafn vel snjókomu.
Fyrstu viðvaranirnar taka gildi á morgun, mánudaginn 3. júní klukkan 17:00. Síðustu viðvaranirnar detta úr gildi á miðnætti 6. júní.
Búist er við mesta hvassveðrinu á Suðausturlandi, allt að 25 metrum á sekúndu. Hviður fara mögulega í allt að 35 metra á sekúndu.
Bændur eru hvattir til að huga að búfénaði og koma þeim í skjól. Vegfarendur eru jafnframt hvattir til þess að fylgjast með upplýsingasíðum Vegagerðarinnar sem og Veðurstofunnar á www.vegag.is og www.vedur.is
