Margir hafa gagnrýnt framboð hennar á þeim forsendum að hún sé of nátengd sitjandi ríkisstjórn og hana skorti fjarlægð til að veita henni aðhald. Hún hafi staðið upp úr stól forsætisráðherra til þess að fara í forsetaframboð.
Ólafur Ragnar var gestur kosningasjónvarps RÚV þar sem hann var spurður út í þessa gagnrýni á framboð hennar.
Ólafur sagði að nú þegar búið væri að loka kjörstöðum gæti hann tjáð sig umbúðalaust um málið. Benti hann á söguleg dæmi um forseta sem voru eða höfðu verið í nánum tengslum við þingmenn sitjandi ríkisstjórnir.
Þetta hafi til dæmis gerst árið 1952 og meira að segja þegar ríkisstjórn var mynduð rúmum áratug eftir að hann varð forseti. Þá hafi margir við ríkisstjórnarborðið verið með honum í Alþýðubandalaginu.
„Það sem menn eru að tala um núna er sandkassaleikur miðað við það sem var 1952 eða þegar ég var forseti,“ sagði Ólafur Ragnar og benti á að hann hafi farið gegn þessum gömlu félögum sínum til dæmis í Icesave-málinu. Loks benti hann á að hann hafi verið þingmaður allt framboðið áður en hann varð forseti og fram á kjördag. „Ég sagði ekki af mér fyrr en ég tók við embættinu. Þessi umræða hefur verið út og suður og andlýðræðisleg,“ sagði forsetinn fyrrverandi.
Ólafur Ragnar sagði að með þessum orðum væri hann ekki að taka neina afstöðu til framboðs Katrínar en hann telur að gagnrýni á hana sé alveg út úr kú.
