„Ég er fullkomlega ósammála Jónasi Sen varðandi söngstíl þessara íslensku söngkvenna. Ég elska þennan nýja söngstíl sem margar söngkonur hafa tileinkað sér á undanförnum árum. Bríet og GDRN eins og Jónas nefnir. Mér finnst þetta svo persónulegt, það er eins og hún sé að syngja bara fyrir mig. Það er ekkert reverb eða einhverjir effektar á röddinni. Hún er bara framarlega í mixinu og söngurinn fullkomlega hreinn. Það er ekki endilega auðvelt að halda lagi þegar þetta er svona áreynslulaust,“
segir leikarinn Jóhannes Haukur Jóhannesson. Vísar hann þar til greinar og gagnrýni Jónasar á tónleikum Guðrúnar Ýrar Eyfjörð Jóhannesdóttur, eða GDRN, sem haldnir voru í Eldborgarsal Hörpu laugardaginn 11. maí.
„Aðfinnslur Jónasar í gagnrýninni snúa að vísu aðallega að hljóðblöndun á tónleikunum. Hann tekur fram að GDRN njóti sín sennilega betur í hljóðveri. En þessi stíll er ekki slæmur, hann er af hinu góða. Ég vil meira af þessu. Meira segi ég,“ segir Jóhannes Haukur í færslu í Facebook-hópnum Menningarátökin.
Bubbi Morthens tjáir sig og segir: „Það eru alltaf eftektar á röddinni sem er geggjað.GDRN er með sjúklega fallega rödd og líka sláandi fögur semur flott lög og texta. Jónas er í raun orðinn dálítið gamall og það er ok Björk er hans söngkona enda kom hann henni að í upphafi greinar hann er hins vegar samkvæmur sjálfum sér og er alltaf hreinn og beinn en hann hefur ekki mikinn skilning á þessari nýju bylgju líkt og raddir þeirra Bríet GDRN og Elínar Hall eru. Hann ætti verða glaður með Unu Torfa þar er nú aldeilis BOBA rödd á ferð.“
„Litlar” raddir geta verið langfallegastar.Eins og vinur minn Pétur Östlund sagði; það er búið að finna upp míkrófóninn. Alger óþarfi að æpa,“ segir Eyþór Gunnarsson tónlistarmaður. „Hélt að þessi deila hefði verið útkljáð þegar þeir Bing Crosby og Fred Astaire og fleiri slíkir fóru að hagnýta sér nýja uppgötvun snemma á 20. öldinni og kallaðist míkrófónn,“ segir Guðmundur Andri Thorsson rithöfundur.
