Miðillinn Bloomberg vekur athygli á þeim mikla fjölda sem hefur gefið kost á sér til embættis forseta Íslands. Segir í frétt miðilsins að vefsíðan island.is hafi gert það svo auðvelt að bjóða sig fram að tugir fólks hafi kastað hatti sínum í hringinn – og það sumir af slysni.

„Um helmingur þeirra ca. 150 einstaklinga sem hafa boðið sig fram hafa nú þegar dregið framboð sitt til baka eftir að fjöldi þeirra skráði sig óvart í framboð þegar þau í raun ætluðu að mæla með öðrum frambjóðendum.“

Bloomberg ræddi við áhrifavaldinn Öldu Coco sem var ein þeirra sem bauð sig óvart fram, en hefur ákveðið að standa við framboðið.

„Þetta var algjörlega óvart,“ sagði Alda og bætti við að hún hafi ætlað að mæla með Ásdísi Rán Gunnarsdóttur.

„Ég áttaði mig á hvað ég hafði gert nánast strax en ákvað að draga framboðið ekki til baka þar sem mér fannst frekar fyndið að halda því til streitu.“

Eins var rætt við hina 59 ára Þorbjörgu Friðriksdóttur sem kom að fjöllum þegar framboð hennar var borið undir hana.

„Ég sat á veitingastað í Vín þegar einhver frá ríkisútvarpinu hafði samband því ég var að bjóða mig fram til forseta. Ég var slegin. Þetta var mjög klaufalegt af mér. Ég var ekki með gleraugun á mér og hef greinilega stofnað til minnar eigin undirskriftasöfnunar.“

Þorbjörg hefur dregið framboðið til baka, en Bloomberg tekur fram að þessi atburðarás hafi orðið til þess að breytingar voru gerðar á vefnum island.is.

Miðillinn rekur að í framboði séu meðal annars leikkona, fjárfestir, fremsti samsæriskenningarsmiður landsins og fyrsti maðurinn í heiminum til að gangast undir tvöfalda handaígræðslu. Eins sé kona að bjóða sig fram fyrir hönd jökuls.

Við þetta megi bæta að forsætisráðherra landsins sé í framboði og ætli sér þannig að stíga út úr stjórnmálastarfi.

Á Íslandi sé embætti forseta viðhafnastaða þar sem þjóðhöfðinginn fari ekki með eiginleg völd heldur sé sameiningartákn þjóðar og verndari stjórnarskrárinnar.