Þjónusta Póstsins hefur aldrei verið hraðari að sögn Ósk Heiðu Sveinsdóttur, framkvæmdastjóra viðskiptavina hjá Póstinum. Þar spilar sjálfvirknivæðingin meðal annars stórt hlutverk eins og segir í tilkynningu. 

„Við hjá Póstinum leggjum áherslu á að koma sendingum fljótt og örugglega til viðskiptavina. Núna í mars voru til dæmis 95% sendinga erlendis frá komnar í póstbox á höfuðborgarsvæðinu daginn eftir að vinnsla þeirra hófst en 72% þar af sama dag. Þetta er mikil bæting  frá því í ársbyrjun í fyrra en þá voru það ekki nema 31% erlendra sendinga sem fóru samdægurs í póstbox.”  

Vinnsla sendinga hefst í síðasta lagi næsta dag eftir að sendingin lendir á Keflavíkurflugvelli. „Það sem skýrir þennan árangur er bætt upplýsingaflæði og betri nýting upplýsinga. Okkar markmið er að sjá til þess að sendingarnar stoppi sem styst við á leið sinni til viðskiptavina og eins og þessar tölur sýna þá hefur það tekist vel,“ segir Ósk Heiða.

Beint í hendur viðskiptavina

Þjónustan hefur að sögn Óskar Heiðu aldrei verið hraðari. „Ástæðan fyrir því að hraðinn hefur aukist margfalt á undanförnum misserum er meðal annars sjálfvirknivæðingin. Þegar einhver pantar vöru í erlendri netverslun berast upplýsingarnar um leið í kerfið okkar í gegnum póstfyrirtækið sem við erum í samstarfi við. Þar af leiðandi getum við afgreitt vöruna hraðar í hendur viðskiptavina.“

Hún segir að með þessu móti sparist mikill tími enda gera viðskiptavinir kröfu um að pakkarnir berist þeim hratt. „Við neytendur viljum líka stýra tímanum okkar sjálfir, til dæmis nýta margir netverslanir og fá sent í póstbox eða heim í stað þess að eyða dýrmætum tíma í akstur og heimsóknir í verslanir hingað og þangað. Hver vill ekki heldur skreppa í sund eða á kaffihús og koma svo bara við í póstboxinu í næsta nágrenni.“