Margrét Friðriksdóttir, ritstjóri Fréttin.is, er hætt við framboð sitt til embættis forseta Íslands. Frá þessu greinir Margrét á Facebook-síðu sinni en þar segir hún að aldrei hafi verið mikil alvara á bak við framboðið.
„Hef ákveðið að taka út nafnið mitt af framboðslistanum. Nú eru 60 einstaklingar búnir að gefa kost á sér, og mér fer bráðum að líða eins og nál í heystakki. Hins vegar var mér aldrei sérstaklega alvara með „framboð“ mitt nema að því leiti að ég stend áfram á þessum gildum og málefnum og mun halda þeim í heiðri um ókomna tíð,“ skrifar Margrét.
Segist hún vilja þakka öllum þeim sem hafi mælt með henni og lagt traust sitt á hana. Sá stuðningur hafi komið henni á óvart og hún væri þakklát fyrir hann.
„Guð blessi ykkur og gefi ykkur visku til að velja forseta sem hefur það að leiðarljósi að vera sameiningartákn, fullveldissinni og hafi að leiðarljósi að vernda kristin gildi og menningararfleifð. Ég vil ekki taka atkvæði frá öðrum frambjóðendum og óska öllum góðs gengis, megi þjóðinni hlotnast þjóðhollan og góðan forseta, Amen,“ skrifar Margrét.
