Héraðsdómur Reykjaness hefur sýknað karlmann af ákæru um líkamsárás og barnaverndarlagabrot gagnvart barni nágranna síns. Var maðurinn ákærður fyrir að hafa rokið út á gang í fjölbýlishúsi á Ásbrú og gripið um háls barnsins. Þá hafi maðurinn sagt barninu með ógnandi hætti að fara og ýtt á eftir því með annarri hendi. Afleiðingarnar voru þær að barnið hlaut bólgu og verki vinstra megin á hálsi og átti erfitt með að kyngja. Fór fjölskylda barnsins fram á skaðabætur upp á 800 þúsund krónur auk dráttarvaxta.
Atvikið átti sér stað laugardaginn 11. febrúar 2023 en þá barst lögreglu tilkynning barn hafi orðið fyrir líkamsárás í fjölbýlishúsi á Ásbrú.
Á vettvangi hitti lögregla á fjölskyldu barnsins sem bar sakirnar upp á hinn ákærða sem var íbúi í húsinu. Sá gaf þá skýringu að börn væru mikið að fíflast á stigaganginum og gera dyraat. Hann hafi orðið pirraður og skammað drengi sem voru á ganginum og gripið um upphandlegg eða axlir eins drengir. Maðurinn hafnaði því að hafa tekið barnið hálstaki en var í kjölfarið handtekinn af lögreglu.
Í áverkavottorði kom fram að barnið kvartaði undan eymslum í háls, virtist lítilega bólgið en ekki var um sjáanlegt mar að ræða.
Lykilsönnunargagn málsins var myndband úr öryggismyndavél þar greina mátti, að einhverju leyti, samskipti aðilanna. Var niðurstaða dómsins að ekki sæist nægilega vel á myndavélinni hvort að maðurinn hefði tekið barnið hálstaki né ýtt því harkalega.
Þá var það verulegur galli á málsmeðferðinni að ekki hafði verið tekið skýrsla af barninu né það beðið um að gefa skýrslu fyrir dómi.
Að þeim sökum ákvað dómari að sýkna manninn af ákærunni og vísa öllum skaðabótarkröfum frá dómi. Allur málskostnaður verður greiddur úr ríkissjóði.
Hér má lesa dóminn í heild sinni
