Eiríkur gerir þar að umtalsefni forsíðufrétt Morgunblaðsins í dag þess efnis að gera íslenskukunnáttu að skilyrði fyrir akstur leigubíla vegna „ófremdarástands“ í málaflokknum. Það er Birgir Þórarinsson, þingmaður Sjálfstæðisflokksins, sem hyggst leggja frumvarpið fram.
Sjá einnig: Próf í íslensku verði gert að skilyrði:Dæmi um 150 þúsund króna gjald frá Keflavík til Reykjavíkur
Eiríkur segir í grein sinni:
„Þetta er vont. Ég hef vissulega talað fyrir því að við getum notað íslensku alltaf og alls staðar á Íslandi, en ég hef jafnframt lagt áherslu á að kröfur um íslenskukunnáttu verða að vera málefnalegar og það má ekki fyrir nokkra muni nota slíkar kröfur til að mismuna fólki á ómálefnalegan hátt.“
Eiríkur bendir á að fólk í margvíslegum þjónustustörfum, til dæmis í verslunum, veitingastöðum og á hjúkrunarheimilum eigi mun meiri og mikilvægari málleg samskipti við fólk en leigubílstjórar.
Segir hann að engin tillaga sé gerð um íslenskukunnáttu þessa fólks. Það sýni glögglega að hvatinn að tillögunni sé ekki vilji til að efla íslenskuna og styrkja stöðu hennar í landinu. Hún sé frekar innlegg í þá ófrægingarherferð gegn fólki af erlendum uppruna sem nú er í gangi og hefur síðustu daga helst beinst gegn leigubílstjórum.
„Hvert skyldi nú vera það „ófremdarástand“ sem vísað er til,“ spyr Eiríkur og vísar svo í umfjöllun Morgunblaðsins þar sem segir:
„Eftir að Morgunblaðið hóf umfjöllun um þessi mál hafa fjölmargir haft samband við blaðið og kvartað yfir samskiptum við erlenda leigubílstjóra. Hafa þær lotið að því að margir hverjir rati ekki um svæðin sem þeir aka um, [og] gjaldtaka hafi verið óheyrileg […].“
Eiríkur segir að honum sé fyrirmunað að sjá hvernig ratvísi leigubílstjóra myndi aukast og fégræðgi minnka bara ef þeir kynnu íslensku.
„Þarna er augljóslega verið að nota íslenskukunnáttu sem yfirvarp til að bægja innflytjendum frá starfinu. Betra væri að koma bara hreint fram og segja að umsækjendur yrðu að heita íslensku nafni, vera hvítir á hörund, og geta rakið ættir sínar til Jóns biskups Arasonar.“
Í umfjöllun Morgunblaðsins sagðist Birgir vonast eftir samstöðu þingmanna stjórnarflokkanna í málinu. Nefndi hann að forsætisráðherra hefði til að mynda tekið vel í hugmyndir um þetta.
„Ég trúi því ekki fyrr en ég tek á að þingmenn, hvort sem er í stjórn eða stjórnarandstöðu, taki undir þessa tillögu. Og ég trúi því allra síst að forsætisráðherra geri það – til þess er hún alltof skynsöm og víðsýn. Þetta er skelfileg tillaga því að hún miðar að því að nota íslenskuna til að kljúfa þjóðina í okkur og hin og eyðileggja þar með möguleika tungumálsins á að vera burðarás samfélagsins sem ég held og vona að sé stefna stjórnvalda. Sameinumst um að hafna þessari tillögu og því hugarfari sem býr að baki henni.“
