Magnús Kjartan Eyjólfsson, tónlistarmaður og aðalsöngvari Stuðlabandsins, greindist með hvítblæði í gær. Unnusta hans, Sigríður Jónsdóttir, greinir frá veikindum Magnúsar í færslu á Facebook. Hún segir þau þakklát fyrir að meinið hafi greinst á byrjunarstigi, en ljóst sé að framundan er nýr veruleiki og stærsta verkefni fjölskyldunnar til þessa.
Magnús Kjartan verður 41 árs á miðvikudag og hafa vinir parsins sent þeim hlýjar baráttukveðjur.
„Lífið hendir í okkur alls konar verkefnum og er oft á tíðum óttalega mikill niðurgangur á sama tíma og það getur verið fallegt, gefandi og frábært. Í dag markar svolítið nýjan veruleika hjá okkur „litlu“ fjölskyldunni þar sem við tökumst á við stærsta verkefnið til þessa. Í gær greindist elsku besti Maggi okkar með bráðahvítblæði. Þessi tegund er svokölluð barnahvítblæði, en 4/5 sem greinast eru börn,“ segir Sigríður, en slær svo léttu gríni á sinn mann: „Enda Maggi minn stórt Mannabarn.“
„Við erum þakklát fyrir að hafa að öllum líkindum uppgötvað þetta strax á algjöru byrjunarstigi en það breytir ekki þeirri staðreynd að framundan er allskonar.“
Maggi dvelur nú á blóð- og krabbameinsdeild LSH við Hringbraut, þar sem hann verður næsta mánuðinn í það minnsta. Segir Sigríður starfsfólkið yndislegt, vel haldið utan um Magga og fjölskylduna, en aðstæðurnar auðvitað óraunverulegar.
Nóttin gekk þokkalega, en Sigríður svaf í stól við hliðina á rúmi Magga. Segir hún hann hafa hvílst ágætlega og gott hafi verið að hitta lækninn hans saman í morgun. Segir hún Magga hafi sagt í gær að sjokkið væri ekki komið, en það færi að síast inn.
„En vissulega smá skjálfti í okkur, en við erum með skýra sýn á það hvað markmiðið er, og það er að koma sterkari út úr þessu saman og senda þetta krabbamein beinustu leið til helvxxxx, og Maggi okkar mun standa uppi sem sigurvegarinn sem hann er!“
Segir Sigríður Magga langa mest heim til að knúsa dætur þeirra og það stefni hann á að gera sem allra allra fyrst.
„Við stelpurnar erum frekar bognar og beyglaðar, en á sama tíma ákveðnar í því að halda öllu gangandi hér heima á meðan okkar allra besti sinnir sínu stóra verkefni, verkefni sem við getum ekki gert fyrir hann. Við finnum stuðninginn, og tökum þessu verkefni af fullum þunga-því það vita það allir að þetta er „keppni“ og ekkert annað en sigur sem er ásættanleg útkoma!“
Segist Sigríður munu reyna að halda öllum eins upplýstum eins og hægt er, Maggi sé með símann sinn og þætti vænt um að fá baráttukveðjur í verkefninu sem framundan er, en heimsóknir og slíkt þurfi að fara í gegnum hana eða starfsfólk deildarinnar. „Með tilliti til hvort hann geti tekið á móti gestum eða hafi þol líkamlega og andlega til þess. Það þarf að stýra því aðeins og óþarfi að hann sé að hugsa um það ofan á allt annað.
Knús og ást á línuna og við öskrum saman hátt og skýrt: FOKK KRABBAMEIN“
