Fiskikóngurinn Kristján Berg Ásgeirsson segir margt ljótt hafa verið sagt um sig og fyrirtæki hans undanfarnar vikur eftir að hann tjáði sig um það að hann vildi ekki tjaldbúðir Palestínumanna á Austurvelli.
„Ég taldi það bara ekki passa við mína menningu og uppruna að leyfa slíkt þar. Taldi bara betra að hafa mótmælin öðruvísi og á öðrum stað,“ segir Kristján í færslu á Facebook og segir hann mjög fáa vita hvaða hug hann ber til samfélagsins og til þeirra sem koma kannski til landsins sem innflytjendur eða flóttamenn.
„Ég er algerlega á móti öllu flóttafólki, innflytjendum sem kemur hingað og hangir á spena íslenska ríkisins. Nennir ekki að vinna, fær íbúðir, tannlæknaþjónustu og annað frítt frá okkur skattgreiðendum svo mánuðum og eða árum skiptir. Þá segi ég NEI takk og vill það fólk í burtu af mínu landi,“ segir Kristján.
Hann segist að ef Ísland ætli að taka á móti fólki þá „þarf að gera það vel frá a-ö, eða sleppa því að taka á móti fólkinu.“
Kristján birtir mynd af sér með nýjasta starfsmanni sínum, Jesus, sem kom til landsins sem flóttamaður fyrir sirka ári síðan.
„Ég var tilbúinn að ráða hann til vinnu fyrir mörgum mánuðum síðan, en vegna fokkings seinagangs hjá öllu sem ríkið tekur sér fyrir hendur og svarar seint og illa, þá hefur hann þurft að vera á spena hjá ríkinu í alltof langan tíma. Hefði verið hægt að spara nokkrar milljónir þar,“ segir Kristján og spyr hvers vegna þetta ferli taki svona langan tíma og segir að þeir sem stjórna landinu þurfi að taka ábyrgð og setja reglur strax. Segir hann nýjasta starfsmanninn Jesus standa sig afbragðs vel í starfi. „Er jákvæður, snyrtilegur, leggur sig fram í starfi og er byrjaður að læra íslensku af miklum krafti. Jesus. Vertu velkominn til starfa hjá okkur og ég óska þér mikillar velgengni í starfi og búsetu hér á landi.
„Ég óska eftir að ríkið taki sig saman í andlitinu, girði sig í brók og vinni þessi flóttamannamál á miklu meiri hraða. Þannig að þeir sem sækja um fái annað hvort NEI eða JÁ svar, sem fyrst um landvistarleyfi. Ef svarið er já, þá þarf fólkið að getað fengið vinnu í einum grænum hvelli. Ekki að þurfa labba um göturnar í marga mánuði og á spena á kostnað skattgreiðanda.“
Kristján segist vera með 22 á launaskrá, 13 eru útlendingar. „Flestir af mínum starfsmönnum koma sem flóttamenn eða vegna fjölskyldutenginga. Ég er með fólk frá: Víetnam, Kólumbíu, Ungverjalandi, Venesúela og einn frá Breiðholti,“ segir Kristján.
„Þið „góða fólkið“ sem rakkið mig og mín fyrirtæki niður getið étið það sem úti frýs.
Það eru menn eins og ég, sem tökum þetta fólk að okkur, sköffum þeim vinnu og gefum þeim tækifæri á að fá launaða vinnu, kennum þeim á íslensku handbrögðin og íslenska menningu, enda er fólkið meira í vinnunni en við nokkuð annað sem það gerir hér á landi.
Þessir starfsmenn mínir, þeir greiða svo skatta og sjá um sig sjálfir ef þau vilja vera hér á okkar landi. Eru sjálfbær og ekki á spena. Er það ekki eins og við viljum hafa þetta??
Það þarf að taka til í þessari ríkisstjórn og setja stífar reglur sem hægt er að vinna eftir og setja reglur á íslensku sem allir skilja. Hætta að tala og fara að framkvæma. Það er vinnan sem ríkisstjórnin á að vinna. Við góða fólkið vil ég segja: Þið vitið ekki neitt um hvernig mitt hjarta slær.“
