Tilkynningar um líkamsárásir og umferðaróhöpp eru margar í dagbók lögreglunnar eftir næturvaktina.
Í umdæmi lögreglustöðvar 1 var einstaklingur handtekinn grunaður um að hafa veist að öðrum með hnefahöggum í hverfi 105. Sá var vistaður í fangaklefa. Tilkynnt var um líkamsárás í miðbæ Reykjavíkur þar sem að árásarþoli var sleginn í andlitið með krepptum hnefa. Gerandi var farinn af vettvangi en lögregla telur sig vita hver þar var að verki.
Einstaklingur var handtekinn í verslun eftir að hafa kastað til vörum og skemmt hillusamstæðu í versluninni. Sá handtekni er einnig sakaður um líkamsárás gagnvart aðila sem að var á vettvangi. Gerandinn var vistaður í fangaklefa.
Tilkynnt var um umferðaróhapp þar sem að bifreið var ekið á umferðarmannvirki þar sem að ökumaður náði ekki að hemla niður sökum hálku og snjóþekju. Ökumaður var óslasaður.
Ekki er þó alltaf veðurfari um að kenna því víman á oft sök á slysum.Tilkynnt var um umferðaróhapp þar sem að bifreið var ekið á tvær mannlausar bifreiðar í miðborginni. Ökumaður reyndist vera ölvaður og var hann handtekinn og færður á lögreglustöð. Tilkynnt var um umferðaróhapp þar sem að bifreið var ekið á umferðarljósavita. Ökumaður reyndist vera ölvaður og undir áhrifum fíkniefna. Sá var handtekinn og færður á lögreglustöð. Grunur leikur á að akstursskilyrði og víma ökumanns hafi átt álíka stóran þátt í að svo fór sem fór.
Í sumum útköllum er ekki allt sem sýnist og svo á við um tilkynningu um öskur og læti frá íbúð í fjölbýlishúsi. Lögregla fór á vettvang og eftir töluverðan tíma kom maður til dyra. Sá hafði verið að spila tölvuleik og sagðist hafa gleymt sér í hita leiksins.
Tilkynnt var um líkamsáras í hverfi 221 þar sem að veist var að aðila með einhverskonar bareflum. Ekki meira vitað að svo stöddu.
Tveir sitja fangageymslur vegna líkamsárásar. Annar var handtekinn í heimahúsi eftir að hann hafi veist að öðrum og haft í hótunum. Sá handtekni var töluvert ölvaður og var hann vistaður í fangaklefa. Í öðru máli var einstaklingur var handtekinn grunaður um líkamsárás, hann reyndist vera undir áhrifum áfengis og var hann vistaður í fangaklefa.
Tilkynnt um eld í bifreið á bifreiðastæði í hverfi 111. Málið er í rannsókn.
Tilkynningar bárust einnig um umferðaróhapp í öðrum hverfum og í einhverjum tilvika eru bifreiðar óökuhæfar á eftir.
Í umdæmi lögreglustöðvar 4 var tilkynnt um farþega í bifreið sem að hélt á ungabarni í fanginu sem að var ekki í viðeigandi öryggisbúnaði. Lögregla stöðvaði bifreiðina og reyndist tilkynningin á rökum reist. Ökumaður á von á kæru og þá verður tilkynning send til barnaverndaryfirvalda.
Ásamt ofangreindum verkefnum sinnti lögreglan verkefnum þar sem að tilkynnt var um fólk í annarlegu ástandi sökum ölvunar, samkvæmishávaða í heimahúsum og ýmsar aðrar aðstoðarbeiðnir.
