Gunnar Ármannsson, lögmaður og fyrrverandi formaður Læknafélagsins, fer hörðum orðum um umfjöllun RÚV um plastbarkamálið í þættinum Þetta helst. Þetta kemur fram í aðsendri grein á Vísir.is.

Sjá um plastbarkamálið meðal annars hér.

Samandregið eru ásakanir Gunnars tvíþættar; annars vegar heldur hann því fram að ýmislegt í þáttunum þar sem vikið er að hlut Tómasar í alræmdri aðgerð á sjúklingi í Svíþjóð, sem leiddi til dauða hans, sé ekki í samræmi við niðurstöðu skýrslu rannsóknarnefndar sem kom út um málið og er öðrum þræði grunnur að umfjölluninni. Gunnar skrifar:

„Meginniðurstaða nefndarinnar er sú að í ljósi allra málavaxta var tilvísun Tómasar á Andemariam til Karolinska eðlileg. Nefndin sá ástæðu til að taka fram sérstaklega (bls. 217) að þótt við hafi bæst síðar að meta einnig hvort ígræðsla væri fýsilegur kostur, hafi tilvísun Tómasar gert ráð fyrir því að Andemariam kæmi til Íslands þremur dögum eftir mat sænsku læknanna og að síðan yrði í framhaldinu tekin ákvörðun um hvaða úrræði hentaði Andemariam best og hann sendur síðar aftur til Svíþjóðar í þá aðgerð.“

Hins vegar gagnrýnir Gunnar harðlega að í umfjöllun þáttarins sé stuðst við ummæli ónafngreindra manna þegar fjallað er um stöðu Tómasar vegna málsins, þar sem segir að hann þurfi að sæta ábyrgð vegna þátttöku sinnar í málinu, en í þættinum var stuðst við samtöl við níu ónafngreindra lækna. Gunnar tekur undir orð Óðins Jónssonar, fyrrverandi fréttastjóra RÚV, af samfélagsmiðlum, þar sem segir:

„Það er auðvitað ekki boðlegt að vitna í ónafngreinda einstaklinga til að grafa undan mannorði nafngreindrar persónu. Það er ekki fréttamennska heldur lúaleg aðför.“

Hvað sem því líður þá viðurkennir Gunnar að hlutur Tómasar í málinu sé gagnrýndur í niðurstöðu rannsóknanefndarinnar en telur að RÚV hafi ekki nálgast þá gagnrýni rétt í umfjöllun sinni. Segir hann að meginniðustaða skýrslunnar sé sú að Tómas hafi ekki brotið af sér.

Sjá nánar hér.