Maður að nafn Jón Valgeir Stefánsson, sem fæddur er árið 2001, hefur verið ákærður fyrir að kveikja í sumarbústað við Kaldárselsveg í Hafnarfirði með þeim afleiðingum að bústaðurinn brann til kaldra kola. Atvikið átti sér stað fyrir tæpum fjórum árum.
Í ákæru héraðssaksóknara segir að Jón sé ákærður fyrir eignaspjöll, húsbrot og brennu með því að hafa aðfaranótt þriðjudagsins 11. febrúar árið 2020, farið að sumarhúsi við Kaldárselsveg í Hafnarfirði, brotið útiljós við húsið og því næst farið heimildarlaust inn um glugga þess. Þar inni hafi hann kveikt eld með þeim afleiðingum að sumarhúsið brann til grunna. „Með athæfi sínu olli ákærði eldsvoða sem hafði í för með sér augljósa hættu á yfirgripsmikilli eyðingu á eignum annarra manna,“ segir í ákærunni.
Héraðssaksóknari krefst þess að Jón verði dæmdur til refsingar og greiðslu alls sakarkostnaðar.
Málið verður þingfest fyrir Héraðsdómi Reykjaness þann 16. janúar næstkomandi.
Jón hefur áður komið við sögu dómstóla en hann var dæmdur fyrir ofbeldi í eftirminnilegu máli sem tengist Elliðavatni. Fékk hann 9 mánaða skilorðsbundið fangelsi fyrir hlut sinn í ofbeldi gegn manni sem neyddur var til afklæðast og vaða í Elliðavatn. DV fjallaði um málið í febrúar í fyrra.
Í fréttinni segir meðal annars:
„Í ákæru segir að frelsissviptingin hafi hafist stuttu eftir að brotaþolinn settist í aftursæti bíls við Árbæjarsafn í Reykjavík, sem einn hinna ákærðu ók. Hinir tveir komu út úr farangursrými bílsins og settust í aftursætið við hlið mannsins.
Þeir hótuðu að úða piparúða í augu hans og neyddu hann þannig til að aka með sér að sumarbústað við sunnanvert Elliðavatn og vera þar. Þar eru þeir sagðir hafa veist að honum með ofbeldi, úðað piparúða í augu hans og slegið hann víðsvegar um líkamann með stálkylfu.
Þeir eru síðan sagðir hafa neytt hann til að afklæðast og fara ofan í Elliðavatn með því að hóta honum frekari líkamsmeiðingum. Að því loknu óku þeir burtu og skildu hann eftir kaldan og blautan við Elliðavatn. Maðurinn er sagður hafa hlotið af árásinni yfirborðsáverka og marbletti á báðum handleggjum, vinstri öxl, vinstri fótlegg og á baki, marbletti á andliti og höfði og yfirborðsáverka á augnsvæði.“
Aths. Fréttinni hefur verið breytt lítillega vegna nýrra upplýsinga.
