Eins og greint hefur verið frá víða um heim voru skjöl sem varða kynferðisbrot og mansal kaupsýslumannsins Jeffrey Epstein opinberuð í vikunni. Í skjölunum má lesa meðal annars um tengsl Epstein við fjölda heimsfrægra einstaklinga en í öðrum skjölum sem opinberuð voru í gær má einnig lesa hvernig hann lokkaði unglingsstúlkur til sín svo hann gæti brotið á þeim.
NBC fjallar um það í dag hvernig Epstein bar sig að við að lokka unglingsstúlkur að heimili sínu í Flórída. Stúlkur, sem Epstein tókst að lokka til sín, fengu síðan greiðslur fyrir að sannfæra vinkonur sínar um að koma líka.
Kona sem var á bilinu 16-17 ára þegar hún var lokkuð til Epstein segir að hún hafi verið fengin þangað undir því yfirskini að hún ætti að vinna við nudd en að hún hafi ekki haft neina reynslu af slíku. Hún segist ekki hafa búist við því þegar hún fór til Epstein að förin væri í kynferðislegum tilgangi.
Hún segir að Epstein hafi afklætt hana gegn hennar vilja þegar þau hittust í fyrsta sinn.
Samstarfskona Epstein, Ghislaine Maxwell, var nýlega dæmd í 20 ára fangelsi, árið 2022, en hún sá um að aðstoða Epstein við að lokka stúlkur til hans undir því yfirskini að þær ættu að sjá um nudd eða önnur störf á heimili hans.
Lögreglumaður sem rannsakaði málið ræddi við á fjórða tug kvenna sem fengnar voru til starfa á heimili Epstein en þær voru flestar yngri en 18 ára.
Allar stúlkunnar voru beðnar um að fá vinkonur sínar til að koma líka. Sumar gerðu það en aðrar ekki.
NBC segir að fátt nýtt komi fram í skjölunum sem opinberuð voru í gær og að þar séu aðrir aðilar en Maxwell og Epstein ekki bendlaðir við málið.
