Guðni Th. Jóhannesson, forseti Íslands, tilkynnti nokkuð óvænt í nýársávarpi sínu að hann hygðist ekki gefa kost á sér til áframhaldandi eftir að hans annað kjörtímabil rennur út.

Guðni er doktor í sagnfræði og kenndi við sagnfræði- og heimspekideild Háskóla Íslands áður en hann tók við embætti forseta árið 2016. Í Morgunblaðinu í dag er rætt við Guðna um þá ákvörðun hans að láta gott heita og hvað tekur við hjá honum.

Guðni segir að nú taki við nýr kafli en enn sé óljóst hvað nákvæmlega tekur við. Hann hefur þó ákveðna hugmynd um það.

„Ég býst þó við að snúa aftur til fræða- og rannsóknarstarfa í sagnfræðinni og hlakka til þess. Vel má vera að eitthvað annað muni líka heilla hugann en við sjáum bara hvað setur,“ segir Guðni.

Hann segist stíga sáttur frá borði enda hefur hann notið mikils stuðnings þjóðarinnar á þeim tæpu átta árum sem hann hefur verið í embætti.

 „Alla mína forsetatíð hef ég fundið fyrir velvilja, stuðningi og hlýhug fólksins í landinu. Ef við horfum út í heim er ekki sjálfgefið að kjörinn þjóðhöfðingi njóti slíks og því er ég innilega þakklátur. Að láta af embætti nú er í anda þeirra orða að hætta beri leik þá hæst fram fer. Ég er sáttur og hlakka til þess sem framtíðin ber í skauti sér,“ segir hann.