Nokkur umræða hefur skapast á samfélagsmiðlum um Perluna eftir að borgarstjórn ákvað að setja hana á sölu. Sitt sýnist hverjum um þessa sérstöku byggingu og ágæti hennar.
„Perlan hefur alltaf goldið þess að vera innihaldslaust hús,“ segir Egill Helgason fjölmiðlamaður á samfélagsmiðlum. „Hún er ljómandi falleg tilsýndar en það voru gömlu hitaveitutankarnir líka. En vandinn er að það hefur aldrei fundist neinn tilgangur með byggingunni.“
Egill nefnir að í Perlunni sé þokkalegur útsýnispallur en rekstur kaffiteríu og veitingahúss hafi ekki gengið sem skyldi. Um skeið hafi Pétur Kristjánsson heitinn verið með tónlistar og vídjómarkað á jarðhæðinni og síðar hafi útgefendur verið með bókamarkað þar. Síðar hafi verið sett upp náttúrusýning og víkingasýning.
„Byggingin var ekki hönnuð fyrir þessa starfsemi, frekar að hún hafi farið þangað af því ekki var í önnur hús að venda,“ segir Egill.
Bendir hann á að þetta séu ekki í fyrsta skipti sem hugmyndir um sölu Perlunnar fara af stað. Alfreð Þorsteinsson heitinn, borgarfulltrúi Framsóknarflokksins, hafi vakið skelfingu fyrir það á sínum tíma.
„Í raun skiptir litlu máli hvort húsið er í eigu einkaaðila eða borgarinnar – þar er altént engin starfsemi sem sérstaklega í verkahring hins opinbera. Hins vegar er spurning hvort finnast kaupendur að húsi sem hefur svo óljósan tilgang og takmarkað notagildi,“ segir Egill að lokum. „Perlan hefði annars verið flott sem brautarstöð – nú eða moska.“
Stefán Pálsson, sagnfræðingur og varaborgarfulltrúi Vinstri grænna, setur mikla fyrirvara við sölu Perlunnar. Áður en slíkt yrði gert yrði að afla upplýsinga um áhrif á orkuöryggi borgarinnar og skilgreina þær kvaðir sem fylgja kaupunum.
„Þegar seinni heitavatnstankurinn var tekinn undir aðra starfsemi komu fram varnaðarorð um að það kynni að leiða til heitavatnsskorts við verstu aðstæður. Þeim var svarað með því að nýr tankur yrði reistur innan skamms en hann hefur aldrei litið dagsins ljós,“ segir Stefán.
Tryggja þurfi áframhaldandi aðgang almennings að mannvirkinu til frambúðar, kynni það að skipta um eigendur.
„Perlan er eitt mikilvægasta kennileiti og aðdráttarafl ferðamanna í Reykjavík og borginni getur ekki staðið á sama um eðli þeirrar starfsemi sem þar er rekin,“ segir hann.
Vitaskuld víkur Stefán einnig að sögu byggingarinnar, en þá í svari við færslu Egils.
„Þegar Perlan var á byggingarstigi var aðaláherslan aldrei á hringsnúandi veitingastaðurinn heldur vetrargarðurinn sem átti að vera í miðsvæðinu. Þar var hugmyndin að fólk gæti spásserað í hálfgerðum aldingarði með suðrænum trjám og plöntum,“ segir Stefán.
