Veitingahúsakeðjan Wok On safnaði samtals 1.140.000 krónum til styrktar Píeta samtakanna í maí síðastliðnum. 

Í tilkynningu segir að Wok On hafi sínum klassísku rauðu „take away“ boxum í gul í maí en 50 krónur af hverjum seldum rétt runnu til Píeta samtakanna sem sinna forvarnarstarfi gegn sjálfsskaða og sjálfsvígum og styðja við aðstandendur. Upphæðin jafngildir um það bil 22.800 seldum réttum.

Þetta var ekki í fyrsta sinn sem „take away“ box Wok On tóku litabreytingum en þau voru bleik í október s.l. til stuðnings Bleiku slaufunnar, átaksverkefnis Krabbameinsfélagsins sem er tileinkað baráttunni gegn krabbameinum hjá konum og eru boxin núna í ágúst í regnbogalitum til að vekja athygli á Hinsegin dögum.

Í tilkynningunni er haft eftir Kristínu Ólafsdóttir, framkvæmdastjóri Píeta: 

„Við erum í skýjunum yfir þessu framtaki Wok On og mun fjárhæðin sem safnaðist hjálpa okkur við að halda áfram að sinna daglegum verkefnum okkar. Verkefni Píeta munu nefnilega því miður seint hætta og því einkar mikilvægt að við séum með sterka stuðningsaðila á bakvið okkur. Einnig hjálpar þetta okkur að vekja athygli á starfinu sjálfu og Píeta sem samtökum sem geta aðstoðað þá sem þurfa á hjálp að halda.“

Efla Rut Gísladóttir, markaðsstjóri Wok ON segir:

„Við vorum lengi búin að ganga með þessa hugmynd í maganum, sérstaklega eftir gott gengi bleiku boxanna í október og því slógum við til. Okkur hjá Wok On langar að láta gott af okkur leiða í samfélaginu og er þetta einfaldlega partur af því að gefa til baka.“

Um starfsemi Píeta samtakanna segir í tilkynningunni:

„Píeta veitir fyrstu hjálp, aðgengilega þjónustu, stuðning og meðferð fyrir þá sem eru í sjálfsvígshættu og brú í úrræði fyrir aðra. Þjónustan er með öllu gjaldfrjáls og stendur til boða öllum þeim sem hafa náð átján ára aldri. Píeta samtökin vinna einnig að því að efla þekkingu og skilning á sálrænum sársauka og sjálfsvígum. Samtökin vilja vera leiðandi í forvarnarstarfi gegn sjálfsvígum á Íslandi. Sími Píeta samtakanna, 552-2218, er opinn allan ársins hring.“