Svæðið er almennt talið hluti af Aserbaídsjan en fólk af armenskum ættum, með stuðningi Armena, hefur ráðið yfir svæðinu frá 1994. Oft hefur komið til átaka á milli ríkjanna um svæðið en nú stefnir hugsanlega í frið og það gætu verið slæm tíðindi fyrir Vladímír Pútín og Rússland.
í síðustu viku sagði Nikol Pasjinian, forsætisráðherra Armeníu, að hann viðurkenni yfirráð Aserbaídsjan yfir svæðinu.
Þessi nýja stefna Armena er háð skilyrðum um tryggingu fyrir því að öryggi Armena á svæðinu verði tryggt því að öðrum kosti getur það haft þjóðhreinsun í för með sér að mati Pasjinian. Rússneska Tass fréttastofan skýrir frá þessu og segir að forsætisráðherrann hafi sagt að hann vonist til að ríkin nái fljótlega saman um texta friðarsamnings og geti skrifað undir hann.
Enn er ekkert fast í hendi varðandi frið en ef þjóðirnar ná saman verða það söguleg tíðindi, einnig fyrir Rússland.
Rússar hafa lengi verið í hlutverki sáttasemjara á milli ríkjanna og Armenía er hluti af rússneska varnarbandalaginu ODKB sem hefur haft í för með sér að Rússar hafa þurft að tryggja frið á svæðinu með því að hafa friðargæslusveitir þar. Deilurnar hafa því gert að verkum að Armenar hafa verið háðir Rússum.
Flemming Splidsboel, sérfræðingur í rússneskum málefnum hjá Dansk Institute for Internationale Studier sagði í samtali við Jótlandspóstinn að ef friðarsamningur komist á muni Rússar örugglega tapa á því. Þeir hafi venjulega haft ávinning af deilum af þessu tagi.
