Rússar eru sagðir hafa gert fjölmargar árásir á Kyiv, höfuðborg Úkraínu, í nótt með flugskeytum og drónum. Hershöfðinginn Valerii Zaluzhnyi, æðsti yfirmaður úkraínska hersins, fullyrti á samskiptamiðlinum Telegram að alls hefðu 37 flugskeyti, 29 Shahed drónar og eitt ómannað flygildi verið skotin niður af úkraínska varnarliðinu en sjö aðrar árásir Rússa hefðu náð í gegnum loftvarnarkerfi borgarinnar og eyðilagt einhverjar byggingar.

Nóttin var því löng fyrir íbúa höfuðborgarinnar sem þurftu að forða sér í öruggt skjól, eins og neðanjarðarbyrgi, á meðan loftvarnarflautur gullu. Þetta er önnur nóttin í röð sem Rússar gera slíkar árásir á Kyiv sem eru þær umfangsmestu síðan stríðið hófst.

Þá hafa borist fréttir af allnokkrum sprengingum í höfuðborginni í morgun og því standa árásir Rússa að öllum líkindum enn yfir. Í umfjöllun CNN kemur fram að markmið árásanna séu að öllum líkindum sálfræðilegur sem og að neyða Úkraínumenn til að eyða dýrmætum skotfærum fyrir loftvarnarkerfi sín. Sum þeirra eru frá tímum Sovétríkjanna og er hægara sagt en gert að afla skotfæra í þau.

Ljóst er að Úkraínumenn hugsa stjórnvöldum í Íran þegjandi þörfina en Rússar hafa keypt hundruði ódýrra Shahed-dróna frá þessari vinaþjóð sinni. Það hefur gert Rússum kleyft að senda árásarbylgjur af slíkum drónum á skotmörk í Úkraínu en drónarnir eru hræódýrir í samanburði við aðra dróna og flugskeyti.

Mykhailo Podolyak, ráðgjafi Volodymyr Zelensky, Úkraínuforseta, sagði í færslu á Twitter að Íran myndi finna fyrir afleiðingum gjörða sinna.

„Í dag langar mig til að minna stjórnvöld í Tehran á grundvallar lögmál lífsins, sérstaklega lögmál bjúgverpilsins. Ekki halda að landafræðilega fjarlægð og núverandi forgangsmál Úkraínu í dag muni einhverju máli skipta. Shahed-drónunum verður dag einn beitt á framleiðanda sinn,“ skrifaði Podolyak herskár.