Vignir Vatnar Stefánsson, nýjasti stórmeistari landsins, tryggði sér nú fyrir stundu Íslandsmeistaratitilinn í skák eftir æsispennandi bráðabana.
Landsliðsflokki Skákþings Íslands lauk fyrr í dag en þar öttu tólf skákmenn kappi um titilinn eftirsótta þar sem allir tefldu við alla. Eftir ellefu daga baráttu varð niðurstaðan sú að þrír skákmenn urðu efstir og jafnir með 8,5 vinninga af 11 mögulegum. Vignir Vatnar og stórmeistararnir Hannes Hlífar Stefánsson og Guðmundur Kjartansson.
Þrímenningarnir voru í sérflokki í mótinu auk hins efnilega Hilmars Freys Hilmissonar sem hlaut 8 vinninga og lagði meðal annars goðsögnina Jóhann Hjartarson í lokaumferðinni.
Beint í framhaldinu fór fram bráðabani milli þremenninganna með styttri tímamörkum. Vignir Vatnar er afburða hraðskáksmaður en á móti kemur eru Hannes Hlífar og Guðmundur afar reynslumiklir og hafa oft hampað titlinum. Hannes Hlífar í heil þrettán skipti en Guðmundur þrisvar.
Að endingu var það æskan sem hafði betur en Vignir Vatnar lagði Guðmund tvisvar að velli í innbyrðisskákum þeirra og gerði tvö jafntefli við Hannes Hlífar. Á meðan gerði Guðmundur svo Vigni mikinn greiða með því að leggja Hannes að velli.
Skákárið 2023 hefur verið gjöfult fyrir Vigni Vatnar en í mars á þessu ári tryggði hann sér stórmeistaratitlinn eftirsótta og varð þar með sextándi stórmeistari Íslands. Vignir er aðeins tvítugur að aldri og hefur háleit markmið í skákinni og Íslandsmeistaratitillinn er staðfesting á því að hann hefur alla burði til að ná eins langt og hann vill.
