Fyrirtaka verður í Héraðsdómi Suðurlands á Selfossi þann 7. júní næstkomandi, í máli manns sem ákærður hefur verið fyrir kynferðisbrot gegn barni. Málið er viðkvæmt og þinghaldið verður lokað.
Kæran er í tveimur liðum og er maðurinn annars vegar sakaður um nauðgun og kynferðisbrot gegn barni með því að hafa brotið gegn stúlku sem hann deildi heimili með. Aldur stúlkunnar er ekki gefinn upp í ákærunni en orðrétt segir:
„Nauðgun og kynferðisbrot gegn barni, með því að hafa í ótilgreindan fjölda skipta á tímabilinu apríl til desember 2020 haft önnur kynferðismök við Y, á heimili ákærða og Y að […], þar sem Y var […], með því að beita Y ofbeldi og ólögmætri nauðung þar sem ákærði nýtti sér yfirburði sína gagnvart stúlkunni og traust hennar og trúnað, en ákærði káfaði á berum kynfærum og brjóstum hennar, stakk fingri í leggöng hennar og lét hana snerta getnaðarlim sinn, en stúlkan var þá á aldrinum […] ára.“
Hins vegar er maðurinn ákærður fyrir kynferðisbrot gegn barni, en til vara fyrir kynferðisbrot og barnaverndarlagabrot, með því að hafa á tímabilinu 4. maí til 17. desember árið 2020 sent stúlkunni kynferðislegar myndir og viðhaft kynferðislegt tal við hana. „Með háttsemi sinni særði hann blygðunarsemi hennar og sýndi henni ósiðlegt athæfi,“ segir í ákærunni.
Héraðssaksóknari krefst þess að maðurinn verði dæmdur til refsingar og greiðslu alls sakarkosnaðar. Fyrir hönd stúlkunnar er gerð krafa um miskabætur upp á 4,5 milljónir króna.
