Nýr hópur, með gamalkunna karla í fararbroddi, hefur skotist fram á sjónarsviðið í Rússlandi. Hann kallar sig „Reiðir föðurlandsvinir“. Þetta er hópur öfgaþjóðernissinna  og í fararbroddi hans er Igor Girkin.

Markmið hópsins er að bjarga Rússlandi og Vladímír Pútín sem stendur frammi fyrir sífellt stærri vandamálum vegna stöðu mála í stríðinu í Úkraínu.

Reuters segir að á fréttamannafundi nýlega hafi Girkin sagt að kerfiskrísa sé í uppsiglingu í Rússlandi, eða öllu heldur að hún fari vaxandi á sama tíma og spennan í samfélaginu vex. „Við erum á brún mjög alvarlegra innri pólitískra breytinga,“ sagði hann.

Þrátt fyrir að Girkin sé mjög gagnrýninn á Pútín og þá telur hann að hann sé sá eini sem er hæfur til að leiða rússnesku þjóðina. „Ef Pútín verður bolað frá völdum er það ávísun á hrun Rússlands,“ sagði hann.

Hvað varðar stefnumál „reiðu karlanna“ sagði Girkin að Rússar eigi að vera miklu miskunnarlausari varðandi stefnu sína í stríðinu og að reka eigi alla núverandi yfirmenn rússneska hersins. „Það er engin málamiðlun. Stríðinu lýkur með rússneska fánanum blaktandi yfir Kyiv eða ósigri Rússlands,“ sagði hann.