Þann 11. maí síðastliðinn sakfelldi Héraðsdómur Reykjaness mann fyrir mjög ósvífin fjársvik.

Maðurinn hringdi í Íslandsbanka, kynnti sig fyrir starfsmanni bankans sem látinn faðir sinn, gaf upp leyninúmer á reikningi föðurins látna og lét starfsmann bankans millifæra 11 milljónir króna af reikningnum inn á sinn eigin reikning.

Auk þess var maðurinn ákærður fyrir að hafa tekið 100 þúsund krónur úr hraðbanka með greiðslukorti föðurins.

Brotin áttu sér stað árið 2021. Maðurinn játaði og var dæmdur í fimm mánaða skilorðsbundið fangelsi.

Gerð var einkaréttarkrafa á manninn fyrir hönd dánarbús föðurins upp á rúmlega 8,5 milljónir króna. Dómurinn féllst á þá kröfu og var maðurinn dæmdur til að greiða dánarbúinu þessa upphæð. Í texta dómsins segir ennfremur:

„Hann játar sök að fullu og fyrir dómi og áður við rannsókn málsins. Af hans hálfu var lýst að honum hefði brugðið mjög við andlát föður síns en þeir hefðu lengi haldið heimili saman og verið nánir. Eftir því sem fram hefur komið í málinu eru ákærði og […] hans einu erfingjar föður þeirra og verður að ætla að hlutur ákærða við búskipti hefði orðið í samræmi við það eftir atvikum. Á hinn bóginn beinist brotið að dánarbúi föður hans, þannig að ætla verður að brotið komi í reynd sérstaklega niður á meðerfingja ákærða, […] hans.“

Dóminn má lesa hér.