Kristófer Gajowski, sem skipulagði bænastund í Landakotskirkju í gær, til stuðnings móður pólsks manns sem myrtur var á bílaplani fyrir utan Fjarðarkaup að kvöldi sumardagsins fyrsta, var ánægður með athöfnina. Um 40 manns sóttu hana.
„Þetta var mjög falleg athöfn,“ segir Kristófer. Hann dáist að viðbrögðum móðurinnar við hinum hræðilega atburði, en hún hafi ekki fyllst hatri. „Hún hefur rétt á því að vera reið en hún segist vera mjög sár en hún dæmir ekki,“ segir Kristófer. Hann hefur skipulagt mótmælafundi og samkomur flóttamanna frá Úkraínu hér á landi og segir að í þeim hópi megi oft finna mjög mikla reiði og hatur enda hafi sumt fólkið misst ástvini í stríðsrekstri Rússa í Úkraínu. Viðbrögð pólsku móðurinnar séu hins vegar laus við hatur.
Kristófer vill halda málþing um ofbeldi á Íslandi á næstunni í ljósi tíðra frétta af ofbeldisglæpum hér undanfarið, ekki síst ofbeldi barna og ungmenna. „Ég er að hugsa um að tala við Grósku, það er góð aðstaða þar og næg bílastæði. Það gætu talað þarna sálfræðingar og fulltrúar frá lögreglu og svo yrðu auðvitað blaðamenn,“ segir Kristófer, sem er alvarlega að hugsa um að skipuleggja málþing á næstunni og fá landsmenn til að horfast í augu við þann vanda sem ofbeldisglæpir eru.
Pólski maðurinn sem lést á dögunm lætur eftir sig eiginkonu og barn. Kristófer segir líklegt að söfnunarreikningur fyrir hönd barnsins verði opnaður á næstunni.
