Áætlað er að aðalmeðferð í máli gegn Magnúsi Aron Magnússyni, sem ákærður er fyrir hrottalegt morð á nágranna sínum, Gylfa Bergmann Heimissyni, þann 4. júní í fyrra, verði um næstu mánaðamót.

Lengi var óvissa um hvort Magnús Aron væri sakhæfur en nú liggur niðurstaða matsmanna loksins fyrir og Magnús Aron mun þurfa að svara til saka. Þetta kemur fram í svari Arnþrúðar Þórarinsdóttur, saksóknara hjá Embætti Héraðssaksóknara, við fyrirspurn DV. Segir hún að áætluð sé aðalmeðferð fyrir Héraðsdómi Reykjavíkur dagana 29. – 31. mars.

Morðið vakti mikinn óhug landsmanna. Í ákæru er árásinni lýst svo, að Magnús hafi fyrst ráðist á Gylfa inni á stigagangi hússins að Barðavogi og síðan utan við húsið. Síðan segir í ákæru:

„…en er komið var út úr húsinu sparkaði ákærði í og kýldi [nafn] og náði honum niður í jörðina og þar sem [nafn] lá á jörðinni, kýldi ákærði, sparkaði og traðkaði margsinnis á höfði hans, þar á meðal andliti, og brjóstkassa, allt með þeim afleiðingum að [nafn] hlaut af húðblæðingar með undirliggjandi mjúkvefjablæðingum og merslu í andliti og hálsi, fjölbrot á neðri kjálka, kinnbeinum, nefbeinum og tungubeini, innkýlt brot í fremri kúpugróf og útbreitt heilamar, sárrifur á vinstra hvirfilsvæði, vinstra augnsvæði og neðri vör og húðblæðingar og mjúkvefjablæðingar í djúpum og grunnum vöðvum aftanverðs háls og lést af völdum höfuðáverkans með kjölfarandi umfangsmiklu heilamari og áverka á andliti sem torveldaði öndun. Auk þess hlaut [nafn] af stakar húðblæðingar og smásár á gripog ganglimum, stakar húðblæðingar og mjúkvefjablæðingar á bol og mjúkvefjablæðingu yfir vinstra herðablaði.“

Nágrannar Magnúsar, sem DV ræddi við daginn eftir morðið í fyrrasumar, lýstu honum sem tifandi tímasprengju. Nágrannarnir töldu að hann ætti að búa í sérstöku úrræði en ekki almennu íbúahverfi. Skömmu fyrir voveiflegt lát Gylfa var lögregla tvisvar kölluð að húsinu í Barðavogi vegna meintrar ógnandi framkomu Magnúsar við aðra íbúa í húsinu.