Wagnerliðar segjast munu umkringja bæinn á næstunni og ná honum á sitt vald. Brýr og vegir hafa verið sprengdir þar á síðustu dögum en sögum ber ekki saman um hvort Úkraínumenn séu að fara að hörfa frá bænum.
En þegar heildarmyndin er skoðuð þá er eitthvað miklu stærra undir, að minnsta kosti ef horft er á samanlagða sókn Rússa og þau spil sem Úkraínumenn hafa á hendi.
Rússar skjóta ekki eins mikið með stórskotaliði og áður og Úkraínumenn fara sparlega með nýju skotfærin sem þeir hafa fengið frá bandamönnum sínum á Vesturlöndum. Þetta benti Jacob Kaarsbo, sérfræðingur hjá dönsku hugveitunni Tænketanken Europa, á í samtali við TV2.
Hann sagði að leyniþjónustuupplýsingar frá Bretlandi og Úkraínu bendi til að Rússa skorti skotfæri fyrir stórskotalið sitt.
Kyrylo Budanov, yfirmaður leyniþjónustu úkraínska hersins, telur að Rússar eigi á hættu að verða uppiskroppa með eitt og annað fyrir herinn innan skamms tíma. Í samtali við USA Today sagði hann að ef rússneska hernum mistekst að ná markmiðum sínum í vor, þá muni hann verða uppiskroppa með vopn, skotfæri og aðrar nauðsynjar.
Hann sagði að Rússar hafi eytt gríðarlegu magni af vopnum og öðrum búnaði í stríðinu, svo ekki væri minnst á mannfallið. Hann sagði að rússneskur efnahagur og framleiðslugeta geti ekki dekkað þetta mikla tap.
Kaarsbo sagði að Úkraínumenn hafi ekki sent þá hermenn sína, sem hafa hlotið þjálfun á Vesturlöndum, til Bakhmut og heldur ekki þá skriðdreka sem Vesturlönd hafa gefið þeim. Hann sagði að þeir vilji geyma þetta þar til þeir geti sjálfir gert stóra gagnsókn og að hún muni væntanlega hefjast í apríl.
Budanov sagði í samtali við USA Today að í vor muni Rússland og Úkraína heyja „afgerandi orustu og verði hún hin síðasta áður en þessi stríði lýkur“.
