Meðal fundargesta voru ítalskur aðalsmaður, samsæriskenningasmiðir, stjórnmálamenn og bandaríski leikarinn Steven Seagal. Pútín vonast til að þessir aðilar, og fleiri, geti dreift áróðri og heimssýn Pútíns í útlöndum.
„Ég er 100% stuðningsmaður Rússa,“ sagði Seagal á fundinum að sögn The Guardian. Hann er þekktastur fyrir leik í B-myndum og kunnáttu sína í bardagaíþróttum. Hann fékk rússneskan ríkisborgararétt 2016.
Honum, og um 90 öðrum, var boðið á samkomuna.
Sergey Lavrov, utanríkisráðherra, ávarpaði samkomuna og hann fór ekki leynt með skoðun sína á hlutunum. „Við sjáum ekki bara nýnasisma, við sjáum beinan nasisma sem leggst yfir sífellt fleiri Evrópuríki. Við sjáum hvernig sagan er eyðilögð fyrir augum okkar og heilög minnismerki eru eyðilögð,“ sagði hann.
Nikolai Malinov, sem sætir refsiaðgerðum af hálfu Bandaríkjanna, tók einnig þátt. Hann hefur verið sakaður um að njósna fyrir Rússa. „Það er kominn tími til að máttur ljóssins sigri illu öflin,“ sagði hann.
Hann var kjörinn leiðtogi alþjóðlegrar hreyfingar stuðningsmanna Rússa. Hreyfingin segist vera með meðlimi frá 40 ríkjum og nýtur hún stuðnings rússneska utanríkisráðuneytisins að sögn Dagbladet.
