Rússneskum hermönnum hefur tekist að komast yfir vestræn vopn á vígvellinum í Úkraínu. Þessi vopn senda þeir til Íran í von um að þarlendum sérfræðingum takist að gera eftirlíkingar af þeim.

CNN skýrir frá þessu en miðillin hefur þetta eftir fjórum ótengdum heimildarmönnum. Segja heimildarmennirnir að Bandaríkjamenn, NATO og mörg vestræn ríki hafi séð dæmi um að rússneskar hersveitir hafi komist yfir lítil vopn á borð við Javelin-skriðdrekaflaugar eða Stinger-flugskeyti sem eru notuð gegn flugförum. Þetta eru vopn sem úkraínskir hermenn hafa neyðst til að skilja eftir á vígvellinum

Í mörgum tilfellum eru Rússar sagði hafa flutt þessi vopn til Íran þar sem þau eru tekin í sundur og rannsökuð í þeim tilgangi að íranski herinn geti reynt að framleiða eigin útgáfur af þessum vopnum.

Segja heimildarmenn CNN að með þessu vonist Rússar til að geta hvatt Írana til að halda áfram að styðja stríðsrekstur þeirra í Úkraínu.

Bandaríkjamenn telja ekki að þetta sé útbreitt vandamál eða kerfisbundið. Ekki er vitað hvort Írönum hafi tekist að búa til sínar eigin útgáfur af vopnum sem þeir hafa fengið send frá Rússum.