Lögreglan á höfuðborgarsvæðinu hafði í nógu að snúast í gærkvöldi og nótt. Meðal þeirra mála sem hún fékkst við var að tilkynning barst um að grunsamlegur aðili hefði barið á dyr og glugga húss í Bústaðahverfi. Þegar lögreglumenn komu á vettvang tók húsráðandi á móti þeim og var hann í miklu uppnámi og með stóran og beittan hníf í hönd.

Grunsamlegi aðilinn fannst ekki þrátt fyrir leit lögreglunnar og ekki bárust fleiri tilkynningar um ferðir hans.

Hótelstarfsmaður óskaði eftir aðstoð lögreglunnar að hóteli í Miðborginni vegna rúðubrots og fylgdi tilkynningunni að gerendur væru enn á vettvangi og væru mjög ölvaðir. Lögreglan ræddi við hina grunuðu og vildu þeir ekki kannast við að hafa brotið rúðuna. Þeir voru látnir lausir að viðræðum loknum.

Lögreglumenn sáu í nótt þegar bifreið var bakkað inn götu í Miðborginni en innakstur í hana er óheimill. Ökumaðurinn yfirgaf síðan bifreiðina vegna ágreinings við tvo aðra. Lögreglan ræddi við mennina og kom þá í ljós að ökumaðurinn var einn af gerendunum í rúðubrotinu sem fjallað er um hér á undan.  Hann var handtekinn, grunaður um að vera undir áhrifum fíkniefna. Hann var vistaður í fangageymslu vegna rannsóknar beggja málanna.