Í samtali við The Telegraph sagði hún að Serbar séu að undirbúa innrás í norðurhluta Kósóvó og njóti stuðnings Wagner-hópsins við það. Wagner-hópurinn hefur komið mikið við sögu í stríðinu í Úkraínu en hann berst við hlið rússneska hersins. Þetta er rússneskur málaliðahópur í eigu Yevgeny Prigozhin, sem hefur oft verið nefndur „Kokkur-Pútíns“. Hafa rússnesk yfirvöld notað hópinn víða um heim í gegnum árin þegar þau hafa viljað ná einhverjum markmiðum sem þjóna hagsmunum Rússa. Er hópurinn orðlagður fyrir grimmd og miskunnarleysi og aftökur og nauðganir.
„Þeir smygla vopnum og einkennisfatnaði, en eru ekki formlega hluti af serbneska hernum. Serbar vilja ná markmiðum sínum (sem eru að innlima Kósovó, innsk. blaðamanns) án þess að kalla það hernaðaraðgerð,“ sagði Osmani í samtali við The Telegraph.
Hún líkti þessum hugsanlegu innrásaráætlunum við innlimun Krímskaga í Rússlandi 2014.
Spenna hefur farið vaxandi í norðurhluta Kósóvó síðustu mánuði en þar búa margir Serbar. Í desember hótaði Aleksandar Vucic, forseti Serbíu, að senda serbneska hermenn til norðurhluta Kósóvó til að „vernda“ serbneska íbúa fyrir lögreglunni. Á sama tíma settu hópar herskárra Serba upp vegatálma á svæðinu.
NATO er með friðargæslulið í Kósóvó til að reyna að koma í veg fyrir átök á milli ríkjanna tveggja.
Serbía viðurkennir ekki Kósóvó sem sjálfstætt ríki og telja Serbar að landið tilheyri Serbíu.
Upphaf óróleikans má rekja til þess að Serbum, búsettum í Kósóvó, var gert að endurnýja ökuskírteini sín en margir höfðu notað ökuskírteini útgefin í Serbíu og voru með serbnesk skráningarnúmer á bílum sínum. En nú var þess krafist að þeir fengju sér kósóvósk ökuskírteini og skráningarnúmer.
Þetta vakti mikla reiði hjá serbneskum íbúum í Kósóvó og þjóðernissinnar reistu vegatálma og skiptust á skotum við lögregluna.
Osmani segir að allt þjóni þetta hagsmunum Serbíu. Hún segir að serbneska ríkisstjórnin hafi kynt undir bálinu til að koma af stað vopnuðum átökum sem myndu síðan enda með innrás í Kósóvó og innlimun landsins í Serbíu.
Serbneskir ráðamenn vísa fullyrðingum Osmani á bug og segja að Wagner-hópurinn hafi enga aðkomu að deilum ríkjanna. En sérfræðingar, sem The Telegraph ræddi við, telja að að líklegt sé að Serbar hyggi á innrás og að hún hefjist um leið og NATO dregur friðargæslulið sitt frá Kósóvó.
Evrópskir og bandarískir hermenn eru í norðurhluta Kósóvó og telja sérfræðingar að svo lengi sem þeir eru þar muni Serbar ekki leggja til atlögu. Ítalskir herlögreglumenn eru einnig að störfum í Kósóvó á vegum NATO.
