Sigurgeir Brynjar Kristgeirsson, framkvæmdastjóri Vinnslustöðvarinnar, segir tvo skipstjórnarmenn á skipinu Huginn VE-55 hafa vanrækt skyldur sínar þegar akkeri féll frá borði og olli skemmdum á neysluvatnslögn til Vestmannaeyja. Atvikið átti sér stað 17. nóvember síðastliðinn og vakti mikla athygli enda var í kjölfar óhappsins stórhætta á því að heitavatnlaust yrði í Vestmannaeyjum. Mönnunum tveimur sem báru ábyrgð á skipinu og fóru báðir með ábyrgð skipstjóra var sagt upp störfum vegna óhappsins.

Skipstjóra- og stýrimannafélagið Verðandi hefur lýst yfir vanþóknun sinni á starfslokum mannanna. Sú ályktun varð Sigurgeiri, framkvæmdastjóra Vinnslustöðvarinnar, tilefni til að birta yfirlýsingu í vefmiðlinum Tígli. Þar segir hann gögn sýna að mennirnir hafi brugðist skyldum sínum. Sigurgeir skrifar:

1. Skoðun Vinnslustöðvarinnar á upptökum úr öryggismyndavélum leiddi í ljós að öryggisloki (keðjustoppari) akkeris Hugins, sem kemur í veg fyrir að akkeri falli ef bremsa á spili er losuð, hafði verið opinn í sex vikur áður en óhappið varð í innsiglingunni í Vestmannaeyjahöfn 17. nóvember 2023.
2. Spil og öryggisloki/keðjustoppari hafa verið prófuð eftir atvikið. Reyndist hvoru tveggja í fullkomnu lagi og héldu akkeri á sínum stað. Réttur frágangur og eftirlit með öryggisbúnaði um borð í skipi er á ábyrgð skipstjóra hverju sinni.
3. Í ljós hefur komið að um var að ræða annað skiptið á tveimur árum þar sem akkeri tapaðist af Hugin. Á því atviki hafa hvorki fengist skýringar né hvort og þá hvernig brugðist hafi verið við, til að mynda með reglulegu eftirliti til að fyrirbyggja að svona nokkuð endurtæki sig.
4. Sjópróf vegna atviksins eru ákveðin 30. janúar 2024. Sjópróf eru skýrslutökur fyrir dómi til að varpa ljósi á aðdraganda og afleiðinga atviksins sem tjónþolar hafa óskað eftir. Sjópróf koma því ekki til álita þegar fjallað er um afleiðingar á borð við þær hvort menn haldi störfum sínum eða ekki.

Sigurgeir segir ennfremur:

„Mat mitt sem framkvæmdastjóra Vinnslustöðvarinnar hf. var að í aðdraganda atviksins hefðu skipstjórnarmenn Hugins ekki rækt skyldur sínar með viðunandi hætti, eins og að framan er lýst. Því var ekki annað verjandi en að gera starfslokasamninga þá. Við það mat stend ég.“