Að minnsta kosti 15 eru látnir eftir að nemandi við Karlsháskóla (e. Charles University) í Prag, höfuðborg Tékklands, framdi skotárás í skólanum í dag.
Í fréttum RÚV kemur fram að 24 séu særðir og þar af níu alvarlega. Árásarmaðurinn er 24 ára gamall.
Mbl.is greinir frá því að starfsfólki og nemendum hafi verið sagt að halda kyrru fyrir, slökkva ljós og byrgja sig inni í kennslustofum og skrifstofum á meðan lögreglan leitaði að árásarmanninum.
Eru sumir nemendur og starfsfólk sögð hafa klifrað út um glugga skólans og staðið á gluggasyllum til að fela sig frá árásarmanninum.
RÚV greinir frá því að mikill viðbúnaður sé í miðborg Prag, þar sem skólinn er. Sprengjusérfræðingar hafi verið sendir inn í skólann vegna gruns um að sprengjur hafi verið faldar þar. Lögreglan hafi náð að yfirbuga árásarmanninn, og sé búin að rýma háskólann.
Innanríkisráðherra Tékkland, Vit Rakusan, segi að hættan sé að öllum líkindum liðin hjá. Ekki sé þó hægt að útiloka að annar árásarmaður sé á ferli.
Bohuslav Svoboda, borgarstjóri Prag, hafi verið staddur í einni af byggingum háskólans þegar árásin var gerð. Hann hafi tjáð tékkneskum fjölmiðlum að Tékkar hefðu hingað til haldið að svona lagað gerðist ekki í þeirra landi.
Í frétt RÚV segir einnig að lögreglan hafi verið að leita að árásarmanninum í háskólanum áður en árásin var gerð. Lögreglustjóri Prag, Martin Vondrasek, hafi greint frá því á blaðamannafundi að árásarmaðurinn hafi átt að halda fyrirlestur í einni af byggingum skólans.
