Um er að ræða gerviefni (e. synthetic) sem kallast nitazen og er framleitt í leynilegum verksmiðjum í Kína. Efnið var fyrst þróað sem verkjalyf af svissneska lyfjafyrirtækinu Ciba á sjötta áratug síðustu aldar en komst aldrei á markað.
Efnið þykir ódýrt í framleiðslu og í fréttum breskra fjölmiðla kemur fram að því sé gjarnan blandað við heróín og falsaðar töflur sem eru sagðar innihalda oxycodone og Xanax. Neytendur hafa oftar en ekki enga hugmynd um að efnin sem þeir kaupa innihaldi hið baneitraða efni.
Í umfjöllun Mail Online kemur fram að nitazen sé hundrað sinnum sterkara en morfín og banvænna en fentanýl sem dregur hundruð þúsunda til dauða á hverju ári.
Í umfjöllun BBC kemur fram að lyfið hafi nú þegar náð nokkurri útbreiðslu í Bandaríkjunum en fyrst varð lögregla vör við efnið á Bretlandseyjum vorið 2021.
