Í tilkynningu frá Almannavörnum segir að Ríkislögreglustjóri, í samráði við Lögreglustjórann í Vestmannaeyjum, hafi ákveðið að lýsa yfir hættustigi Almannavarna vegna skemmda á neysluvatnslögn sem liggur til Vestmannaeyja. Raunveruleg hætta sé á að neysluvatnslögnin rofni alveg.

Fyrir liggi að umfang skemmda sé mikið og alvarlegt. Skemmdirnar nái yfir um 300 metra kafla á lögninni. Á myndum sem teknar hafi verið neðansjávar sjáist jafnframt að lögnin hafi færst verulega úr stað. Þessi staða geri möguleika á bráðabirgðaviðgerð erfiða.  Eina varanlega lausnin sé ný lögn. Mikilvægt sé að vinna mat á afleiðingum sem takmarkað rennsli vatns eða algert rof hefði á íbúa og starfsemi í Vestmannaeyjum og hrinda af stað mótvægisaðgerðum til að koma í veg fyrir að neyðarástand skapist.

Almannavarnadeild ríkislögreglustjóra, í samráði við lögreglustjórann í Vestmannaeyjum, Vestmannaeyjabæ, HS veitur, viðbragðsaðila og aðra hagaðila, vinni á næstu dögum að tillögum og framkvæmdum því tengt. Markmið þeirrar vinnu sé að tryggja öryggi og velferð Vestmanneyinga.

Að svo komnu sé lögnin enn nothæf og þjóni vatnsþörf Vestmannaeyja að fullu. Því sé ekki þörf á að spara eða safna vatni að svo stöddu, segir að lokum í tilkynningu Almannavara.