Óhætt er að segja að myndbönd sem Þorleifur Hjalti Alfreðsson, íbúi í Grindavík, birti á Facebook-síðu sinni hafi vakið óhug meðal Grindvíkinga.

„Það sést ekkert að hérna núna, ég ætla að prófa aðeins að fikta í þessu.“

Á myndböndunum má sjá garðinn við heimili Þorleifs og fjölskyldu hans við Mánagötu í Grindavík. „Ég á fjögur börn, og þetta er fótboltavöllur barnanna bak við húsið. Björgunarsveitin kom áðan og við stikuðum þetta út og þetta er sennilega sprunga sem liggur í gegnum lóðina. Húsið virðist í lagi, en ég er ekki farinn að hallamæla það. Stéttin er sprungin og innkeyrslan er búin að færast um 10 sentimetra, gliðna og springa. Malbikið er svo komið frá húsinu, samt er hvergi bunga á innkeyrslunni, ég veit ekki hvort að húsið hoppaði,“ segir Þorleifur í samtali við DV.

Myndböndin eru tekin fyrr í dag þegar Þorleifur var við vinnu í Grindavík, en hann starfar sem rafverktaki. „Ég var að fara í nokkur fyrirtæki, slá inn frystikæla og svona, og fór svo heim í hádegismat, borða samlokuna heima og þá varð ég var við þetta. Mig grunar að margt svona eigi eftir að koma í ljós,“ segir Þorleifur. Hann segir lítið vit í að fara í viðgerðir á bænum ef land er enn að síga. „Það allavega hljómar ekki skynsamlega.“

Myndböndin hafa vakið athygli meðal íbúa bæjarins, sem nú eru dreifðir víða eftir að bærinn var rýmdur 10. nóvember síðastliðinn. Má sjá að þau valda óhug meðal fólks enda virðist ekkert að garðinum þegar horft er yfir hann.

„Það fer ágætlega um okkur. Við byrjuðum í 60 fm inn á systur minni á Hverfisgötu, og erum núna komin í tveggja svefnherbergja íbúð í Norðlingaholti, fín íbúð,“ segir Þorleifur aðspurður um hvar fjölskyldan dvelur í dag. „Það hefur verið komið mjög vel fram við okkur, þetta leysist allt saman,“ segir Þorleifur jákvæður í bragði.