CNN greinir frá því að það hafi tekið starfsmenn í verksmiðju rafbílaframleiðandans Tesla í Svíþjóð, sem eru í verkfalli, rúman mánuð að fá einhver viðbrögð frá forstjóra og einum helsta eiganda fyrirtækisins Elon Musk. Musk er ríkasti maður heims. Musk er þekktur fyrir að vera andsnúin verkalýðsfélögum en þeim sænsku hefur tekist að reita hann verulega til reiði.
„Þetta er klikkun“ sagði Musk fyrir helgi í færslu á samfélagsmiðli sínum, X.
Var hann þá að vísa til að starfsmenn sænsku póstþjónustunnar hafa í samúðarskyni við verkfall starfsmanna Tesla neitað að senda Tesla-númeraplötur.
Starfsmennirnir sem eru í verkfalli eru bifvélavirkjar sem neita að sinna viðgerðum á bifreiðum fyrirtækisins. Þeir starfa hjá dótturfélagi Tesla í Svíþjóð og fóru í verkfall í síðasta mánuði eftir að fyrirtækið neitaði að viðurkenna verkalýðsfélag þeirra.
Fleiri starfsstéttir tóku fljótlega þátt í verkfallinu. Meðal annars hindruðu ahfnarverkamenn sendingar á Tesla-bifreiðum í öllum sænskum höfnum og rafvirkjar hættu að sinna viðhaldi á bifreiðunum.
Verkalýðsfélag sem starfsmennirinir tilheyra segir verkfallið snúast um góð laun, góð eftirlaun og góðar tryggingar fyrir alla meðlimi sem starfi hjá Tesla. Félagið hafi lengi átt í viðræðum við Tesla sem neiti að skrifa undir almenna kjarasamninga og brjóti gegn grundvallaviðmiðum sænsks vinnumarkaðar.
Um 90 prósent vinnandi fólks í Svíþjóð tilheyrir verkalýðsfélögum og falla þar með undir almenna kjarasamninga.
Tesla á sér hins vegar sögu um mikinn fjandskap í garð verkalýðsfélaga. Starfsmönnum þess í Bandaríkjunum hefur mistekist nokkrum sinnum að mynda með sér verkalýðsfélög vegna hörku fyrirtækisins og veikrar vinnumálalöggjafar í landinu.
Tesla og Elon Musk sjálfur hafa verið sökuð um að yfirheyra, beita agaviðurlögum eða mismuna á annan hátt þeim starfsmönnum sem styðja verkalýðsfélög.
Fyrr á þessu ári voru 30 starfsmenn fyrirtækisins í verksmiðju þess í Buffalo reknir eftir að hafa reynt að stofna verkalýðsfélag.
Hugsanlega mun verkfallið í Svíþjóð blása starfsmönnum Tesla í Þýskalandi baráttuanda í brjóst. Fyrirtækið rekur verksmiðju nærri Berlín og þar starfa 11.000 manns. Verkalýðsfélög hafa þrýst á Tesla að gera kjarasamning við starfsmennina. Eitt þeirra segir starfsmenn Tesla á lægri launum en starfsmenn annarra bílaframleiðenda í Þýskalandi.
Tesla hefur sótt um leyfi til að tvöfalda verksmiðjuna í Þýskalandi. Gangi þær áætlanir eftir verður um að ræða stærstu bílaverksmiðju Evrópu.
