Umfjöllunin byggist á gögnum sem láku frá Cypcodirect, kýpverskri fyrirtækjaþjónustu sem sérhæfir í daglegum rekstri skúffufyrirtækja fyrir erlenda einstaklinga. Gögnin voru afhent ICIJ, alþjóðlegum samtökum rannsóknarblaðamanna.
Að sögn Heimildarinnar sýna gögnin hvernig hópur fólks sem tengist helst í gegnum hinn fallna Kaupþing banka hefur getað fjárfest fyrir hundruð milljóna víða um heim, auk þess að geyma auð sinn á erlendum reikningum og lánar sjálfu sér fé sem geymt er á Tortóla.
Í umfjöllun Heimildarinnar kemur meðal annars fram að peningar sem geymdir eru í aflandsfélögum á Tortóla séu látnir streyma til félaga á Kýpur í þeim tilgangi að fjármagna byggingu lúxusíbúða á Spáni.
Fram kemur að þrjár konur séu lykilleikendur í umræddum fasteignaverkum og allar eru þær eiginkonur fyrrverandi stjórnenda hins fallna Kaupþings banka.
Um að ræða þær Önnu Lísu Sigurjónsdóttur, eiginkonu Hreiðars Más Sigurðssonar sem var bankastjóri Kaupþings, Lovísu Maríu Gunnarsdóttur, eiginkonu Magnúsar Guðmundssonar sem var bankastjóri Kaupþings í Lúxemborg og Þórhildi Einarsdóttur, eiginkonu Steingríms P. Kárasonar sem var forstöðumaður áhættustýringar hjá bankanum.
Í umfjölluninni kemur fram að þær hafi saman átt nokkur félög sem skráð hafa verið á Tortóla, Kýpur, Danmörku og Spáni, en um þessi félög hafa streymt hundruð milljónir króna sem hagnaður og lán.
Hér má nálgast nýjasta tölublað Heimildarinnar.
