Snúa þurfti fraktvél íslenska flugfélagsins Air Atlanta við fimmtudaginn 9. nóvember síðastliðinn vegna þess að hestur losnaði. Vélin var á leið frá New York í Bandaríkjunum til Liege í Belgíu.
Vélin er af gerðinni Boeing 747 og áhöfnin íslensk. Þegar vélin var komin í 31 þúsund feta hæð eftir flugtak frá JFK flugvellinum í New York bað flugstjórinn Jónas Kr. Gunnarsson um leyfi til að snúa til baka. Vélin var þá komin nálægt Boston.
„Við erum fraktvél með lifandi dýr, hest, um borð. Hesturinn náði að sleppa úr stíu sinni. Við eigum ekki í neinum vandræðum með flug en við þurfum að komast aftur til New York þar sem við getum ekki fest hestinn á ný,“ sagði Jónas við flugturninn í New York. Fékk hann leyfi til að snúa við.
Fjallað er um málið á mörgum af helstu miðlum heims, svo sem bandarísku sjónvarpsstöðinni ABC og breska dagblaðinu The Sun. Að því sem DV kemst næst var það þó skagfirski miðilinn Feykir sem fjallaði fyrst um málið, enda Jónas með skagfirskar rætur.
Hesturinn losnaði innan við 30 mínútum frá flugtaki. Mikil ókyrrð var í flugtakinu og hesturinn fældist. Náði hann að stökkva úr sinni stíu í yfir í stíu hjá öðrum hesti. Slasaðist hann mikið við þetta og þurfti að sprauta hann með deyfilyfjum á staðnum. Sérþjálfað fólk var í vélinni til þess að sjá um hestana eins og ávallt þegar Air Atlanta flýgur með lifandi dýr.
Beðið var um að dýralæknir yrði á vellinum til að taka á móti hestinum. Ekki tókst hins vegar að bjarga hestinum sem drapst skömmu eftir lendingu.
Dæla þurfi miklu bensíni, um 30 tonnum, úr vélinni út í sjó áður en lent var. Þetta er vegna þess að leyfileg hámarks lendingarþyngd er talsvert lægri en flugtaksþyngd.
„Vélinni var snúið við hratt og örugglega samkvæmt öllum ferlum. Hún var komin aftur í loftið skömmu síðar. Áhöfnin gerði þetta allt saman hárrétt,“ segir Baldvin Már Hermannsson forstjóri Air Atlanta við DV.
Hann segir að engin hætta hafi verið á ferðum fyrir fólk eða vélina. „Þarna var fyrst og fremst verið að hugsa um velferð hestsins,“ segir hann.
