Allir vegir til Grindavíkur eru lokaðir og umferð um þá óheimil, eins og kemur fram í færslu Vegagerðarinnar.

Vegirnir verða lokaðir þar til Almannavarnir telja öruggt að opna fyrir umferð, hvort heldur er takmarkaða umferð eða alla umferð. Það verður ekki í dag eða nótt. 

„Það er ekki að ástæðulausu sem það er lokað, ekki eingöngu vegna jarðhræringa og mögulegs goss heldur einnig vegna ástands veganna eins og þessar myndir sem hér fylgja bera með sér.“

Vegagerðin fór í dag inn á svæðið til að kanna ástand vegakerfisins. Sjá má að vegir í og við Grindavík eru víða mjög illa farnir og ekki hægt að nýta þá í því ásigkomulagi sem þeir eru. 

Ennfremur kemur fram að verktakar sem vinna fyrir Vegagerðina í ýmsum framkvæmdum hafa lagt fram tæki og mannskap til að byggja varnargarða komi til þess að farið verði í slíkar framkvæmdir. Vegagerðin mun einnig styðja slíkar aðgerðir á allan þann hátt sem mögulegt er, en Vegagerðin nú sem fyrr kemur að almannavörnum. Fylgjast má með lokun vega á www.umferdin.is en þar eru upplýsingar uppfærðar jafnóðum og þær berast.