Cassandra var aðeins 27 ára þegar hún heimsótti 193. landið á listanum en hún hefur ferðast ein til allra þessara ríkja. Auk þess hefur hún komið til Taívan, Kósóvó og Palestínu.
Þessi bandaríska ofurkona var orðin 18 ára þegar hún fór fyrst út fyrir landsteinana en þá heimsótti hún nágrannaríkið Kanada. „Þá vaknaði þessi þörf til að fara á staði sem ég hef ekki komið á áður og ferðast um heiminn. Ég var sérstaklega spennt fyrir stöðum sem almennt eru ekki taldir öryggir og staðir sem fólk almennt ferðast ekki mikið til,“ segir hún.
Cassandra kom til Íslands undir lok árs 2015 og miðað við Instagram-síðu hennar heimsótti hún meðal annars Bláa lónið.
View this post on Instagram
Í efsta sæti á lista Cassöndru yfir eftirlætislöndin er Argentína, en þar hefur hún varið dágóðum tíma síðustu ár. Hún hefur kynnst góðu fólki þar og þá er náttúrufegurðin í Patagóníu einstök.
Í öðru sæti á listanum er Austurríki en Cassandra segist vera mikil útivistarmanneskja. Austurríki er algjör útivistarparadís með sínum háu fjöllum og sinni fallegu náttúru.
Í þriðja sæti á listanum er Bútan sem liggur í austurenda Himalajafjalla á milli Indlands og Kína. Bútan er landlukt og býsna sérstakt land þar sem íbúar eru friðsælir og hamingjusamir, að sögn Cassöndru. Náttúran þar er svo auðvitað einstök. Segist hún hvetja alla ferðalanga til að heimsækja Bútan að minnsta kosti einu sinni um ævina.
Í fjórða sæti á listanum er svo Pakistan og í fimmta sæti er Vanúatú í Suður-Kyrrahafi. Hún ferðaðist um allt Pakistan og segir að maturinn þar sé einstakur. Náttúrufegurðin er mikil í Pakistan og þar geta allir fundið eitthvað við sitt hæfi; strendur, tilkomumikil skóglendi og Himalaya-fjöllin. „Fólkið var líka einstakt og mjög vinalegt.“
Í sjötta sæti á lista Cassöndru er svo Ísland. „Ísland er annað land sem ég hef heimsótt nokkrum sinnum því ég fæ ekki nóg af náttúrunni. Þetta er fullkominn staður til að flýja á til að ná slökun og andlega íhugun.“ Cassandra segir að Íslendingar séu skemmtilegir og þeir taki vel á móti ferðamönnum, maturinn sé dásamlegur og náttúrufegurðin auðvitað einstök.
Fyrir neðan Ísland, í sætum 7. til 10. eru Óman, Bandaríkin, Máritíus og Túnis.
Hún segir að nokkur lönd komist ekki á listann vegna þess hvernig komið var fram við hana. Hún nefnir Ítalíu í þessu samhengi, land sem henni þykir vænt um, en í hvert einasta skipti sem hún kemur þangað segist hún vera áreitt af karlmönnum. Þetta sé synd því ítalskar konur komi vel fram.
Annað land sem olli henni vonbrigðum var Norður-Kórea, ekki síst í ljósi þeirra ströngu reglna sem gilda um heimsóknir erlendra ríkisborgara. Hún segir að leiðsögumaður hennar hafi verið frábær en hann þurfti að vera með henni hvert sem hún fór. Þá mátti hún ekki fara út af hótelherberginu sínu og þurfti að skilja fartölvuna sína, síma og GPS-staðsetningarbúnað eftir á flugvellinum því annars hefði hún átt á hættu að hann yrði gerður upptækur. Það eina sem hún mátti vera með var GoPro-myndavél sem hún var reiðubúin að tapa.
Hægt er að skoða myndir frá ferðalögum Cassöndru á Instagram-síðu hennar.
