„Við erum öll harmi slegin vegna þess hörmulega slyss sem varð við Ásvelli í Hafnarfirði í gær,“ segir Þorsteinn Víglundsson, forstjóri Eignarhaldsfélagsins Hornsteins sem á og rekur BM Vallá.

Átta ára gamall drengur lét lífið þegar hann varð fyrir steypubíl á vegum fyrirtækisins seinnipartinn í gærkvöldi. Tilkynning um slysið barst kl.17.10 í gærkvöldi en slysið varð syðst á Ásvöllum við bifreiðastæði á milli Ásvallalaugar og íþróttahúss Hauka. Drengurinn var þar á reiðhjóli þegar hann varð fyrir bílnum.

Eins og gefur að skilja hefur málið reynt verulega á starfsmenn fyrirtækisins.

„Hugur okkar allra er hjá fjölskyldu og ástvinum drengsins sem lést og öllum sem eiga um sárt að binda. Á þessari stundu einbeitum við okkur að því sem við getum gert, veita upplýsingar og aðstoð til allra sem að málinu koma og hlúa að okkar starfsfólki,“ segir Þorsteinn enn fremur.

Lögreglan á höfuðborgarsvæðinu og rannsóknarnefnd samgönguslysa rannsaka nú tildrög slyssins.