Í tilkynningu frá Lögreglunni á höfuðborgarsvæðinu kemur fram að þegar grunnskólar í umdæmi embættisins hefji göngu sína á nýjan leik eftir sumarleyfi sé lögreglan þar jafnan við  umferðareftirlit og svo hafi einnig verið í ár. Sérstakur myndavélabíll embættisins hafi mælt hraða ökutækja við á fjórða tug grunnskóla, eða í næsta nágrenni þeirra, einna helst við gönguleiðir skólabarna víða í umdæminu í bæði ágúst og september síðast liðnum.

Við þessar hraðamælingar hafi um 750 ökumenn verið staðnir að hraðakstri í og við grunnskólana og hafi verið sektaðir fyrir vikið. Í tilkynningunni segir enn fremur að í grófasta tilvikinu hafi verið um ræða bifreið, sem var ekið á 84 kílómetra hraða á klukkustund þar sem leyfður hámarkshraði er 30 kílómetrar á klukkustund. Ökumaður hennar eigi yfir höfði sér ákæru.

Lögreglan á höfuðborgarsvæðinu vill minna ökumenn, enn og aftur, á að aka varlega, ekki síst í námunda við skóla enda margir þar á ferli, meðal annars nýir vegfarendur sem hófu skólagöngu í sumarlok.