Landvernd hefur afhent sveitarstjórn Múlaþings tæplega 6 þúsund undirskriftir gegn áformum um vindorkugarð á Klausturselsheiði. Um er að ræða vindmyllugarð sem stæði á svæði sem yrði eins og rúmlega 5.700 fótboltavellir.
„Með þessu erum við að sýna sveitarstjórninni að það eru mjög stór álitaefni varðandi svona svakalega stóra virkjun í villtri íslenskri náttúru,“ segir Auður Önnu Magnúsdóttir, framkvæmdastjóri Landverndar.
„Þarna eru mikilvæg fuglasvæði og mikilvæg votlendi. Þetta eru sérstök víðerni og alveg dásamlegur staður til að vera á. Áformin eru mjög stórtæk og ekki eitthvað sem hljómar skynsamlega í okkar eyru,“ segir hún.
Norska fyrirtækið Zephyr vill reisa allt að 100 vindmyllur, 250 metra að hæð, í landi Klaustursels í Jökuldal Efri sem er í eigu Aðalsteins Jónssonar. Vindorkuverið myndi skaffa 500 megawött sem myndi gera það að næst stærstu virkjun landsins.
„Þarna eru mikilvæg fuglasvæði og mikilvæg votlendi. Þetta eru sérstök víðerni og alveg dásamlegur staður til að vera á. Áformin eru mjög stórtæk og ekki eitthvað sem hljómar skynsamlega í okkar eyru,“ segir Auður. Þá sé mikil plastmengun af vindmyllunum, hljóð og sjónmengun.
Þá séu einnig ýmsar röksemdir gegn framkvæmdinni sem lúta þó ekki að náttúruvernd. Svo sem hver eigi að kaupa orkuna og hver eigi að tryggja jöfnunarorku þegar verið er ekki að afla orku sjálft.
Aðspurð um fólkið á listanum segir Auður það vera blöndu fólks af svæðinu og annars staðar frá. „Við vitum að það er mjög mikil andstaða á svæðinu þó við vitum ekki hvernig hún er prósentulega séð. En Austurland hefur mjög sterka sögu í náttúruvernd,“ segir Auður.
Sveitarstjórn Múlaþings samþykkti samhljóða bókun í janúar um að ekki yrðu teknar ákvarðanir um nýtingu vindorku á meðan stefna stjórnvalda lægi ekki fyrir í málaflokknum. Guðlaugur Þór Þórðarson, umhverfis-, orku- og loftslagsmálaráðherra skipaði starfshóp um vindorkumál sem á að skila af sér skýrslu í lok október.
Málið var hins vegar tekið aftur til umræðu núna í haust eftir að undirskriftalistinn kom inn á borð.
Lýstu fulltrúar tveggja flokka sig þá andvíga áformunum um vindorkugarð. Það er fulltrúar Vinstri grænna og Miðflokksins, sem báðir sitja í minnihluta.
Fulltrúar meirihlutans virðast þó heldur ekki vera spenntir fyrir vindorkugarði þó að þeir vísi í fyrir bókun enn sem komið er.
„Eins og staðan er í dag er það ekki hagkvæmt fyrir einn eða neinn að setja upp vindorkubúgarð, ekki fyrir sveitarfélögin að minnsta kosti. Við græðum ekkert á því. Það eru lítil fasteignagjöld af þessu og fá störf. Það er vænlegra fyrir okkur að fá flest alla aðra atvinnu inn í sveitarfélagið,“ segir Jónína Brynjólfsdóttir, forseti sveitarstjórnar og oddviti Framsóknarflokks.
Hún áréttar hins vegar að málið sé ekki komið til afgreiðslu. Sveitarstjórn hafi átt samtal við Zephyr og verið upplýst um áform fyrirtækisins en þau þurfi að fara fyrir rammaáætlun og umhverfismat áður en komi til skipulagsvinnu sveitarfélagsins.
