Lögregla hefur hætt rannsókn á þremur málum er varða kærur jafnmargra kvenna gegn Sölva Tryggvasyni hlaðvarpsstjóra. Málin ollu því að Sölvi hrökklaðist úr starfi um tíma og hvarf úr sviðsljósinu.

Vísir greinir frá þessu og fer yfir atburðarásina í tengslum við „slaufun“ Sölva vorið 2021 og eftirmál þeirra atburða. Vísir hefur undir höndum gögn sem sýna að rannsóknir vegna þriggja kæra á hendur Sölva hafa verið felldar niður.

Sölva-málin hófust með umræðu um að þjóðþekktur maður hefði keypt sér kynlífsþjónustu og síðan gengið í skrokk á konunni sem veitti þjónustuna. Þetta var vorið 2021. Sölvi var þar ranglega bendlaður við brot sem Vilhjálmur Freyr Björnsson framdi og var sakfelldur fyrir í fyrra.

Sölvi kom síðan fram sem viðmælandi í eigin hlaðvarpsþætti þar sem lögmaður hans, Saga Ýrr Jónsdóttir, ræddi við hann. Þar lýsti hann sig saklausan af áburði um ofbeldisbrot en sagði frá átökum við fyrrverandi kærustu sína sem hefði hótað því að svipta hann mannorðinu.

Eftir þáttinn lögðu tvær konur fram kærur á hendur Sölva fyrir ofbeldi. Önnur konan kærði hann fyrir ofbeldisbrot á heimili hennar og mun það vera fyrrverandi kærasta hans. Önnur kona kærði Sölva fyrir kynferðisbrot sem á að hafa átt sér stað á heimili hans í júní árið 2020. Ekki er gerð nánari grein fyrir þriðja málinu í frétt Vísis fyrir utan að greina frá því að þriðja konan hafi kært hann og hafi það verið gert í kjölfar hins umtalaða hlaðvarpsþáttar þar sem Sölvi var í viðtali við lögmann sinn.

Lögregla hefur fellt niður rannsókn í öllum málunum þremur. Sölvi hefur snúið til baka með hlaðvarpsþátt sinn en Vísir hefur orð á því að ólíkt því sem áður var komi ekki lengur fram þjóðþekkt fólk í þáttum hans heldur fólk sem gjarnan syndir gegn straumnum í þjóðfélagsumræðunni.