Eitt sinn voru einkamálasíður dagblaða vinsæll vettvangur makaleitar en stafrænu samskiptin, eins og til dæmis Tinder, hafa gert það að verkum að slíkar auglýsingar eru nánast útdauðar. Íslenskir bændur ætla sér þó að halda einkamálaauglýsingunum á floti og í nýjasta tölublaði Bændablaðsins hafa tvær slíkar vakið athygli.

Annars vegar er það auglýsing frá „austfirska folanum“ hinum tuttuga og tveggja ára gamla Sigurði Borgari sem hefur ekki enn fundið hina fullkomnu kleinukonu og vill ólmur fylla í það skarð.

Hin auglýsingin er frá fertugri ungfrú, sem búsett er í Reykjavík, sem óskar eftir karlmanni á svipuðum aldri sem skartar svokölluðum „Dad-body“ og er heiðarlegur, fyndinn og fjárhagslega sjálfstæður. Slíkir menn eru þó sjaldgæfari en jöklarósir og því spurning hver viðbrögðin verða.

Þetta er ekki í fyrsta skipti, né sennilega það síðasta, sem einkamálaauglýsingar Bændablaðsins vekja athygli. Þannig fjallaði Hringbraut um slíka auglýsingu í nóvember síðastliðnum þar sem smiður nokkur úr Hafnarfirði auglýsti eftir kampakátri bóndadóttur, helst þó dóttur stórbónda.

„Ertu stór­bóndi á Suður­landi? Áttu dóttir sem gengur ekki út? Hand­laginn smiður úr Hafnar­firði á þrí­tugs­aldri leitar eftir kynnum við kampa­káta bónda­dóttur. Á­huga­samir hafi sam­band í hfjsmidur@gma­il.com, gaman ef mynd fylgir,“ segir í aug­lýsingunni.

Hér má svo lesa um fleiri skemmtilegar einkamálaauglýsingar Bændablaðsins.