Sigmundur Davíð Gunnlaugsson, þingmaður Miðflokksins, benti á það í gærkvöldi að í tíma í stjórnmálafræði í Verzlunarskóla Íslands hafi verið sýnd glæra þar til upptaldir voru þrír „merkir þjóðernissinnar“

Þar mátti sjá mynd af þeim Adolf Hitler og Benito Mussolini. Með þeim á glæru var svo Sigmundur sjálfur.

Sagði Sigmundur ljóst að þarna sé á ferðinni pólitískur áróður í kennslu.

„Ég veit ekki hvort óþverrabragð kennarans við Verzlunarskólann starfar eingöngu að löngum til að afvegaleiða nemendur pólitískt eða hvort hann var sjálfur afvegaleiddur á yngri árum og veit bara ekki betur.“

DV hafði samband við Guðrúnu Ingu Sívertsen, skólastjóra Verzlunarskólans, til að fá hennar viðbrögð við málinu.

„Viðbrögð mín eru að benda á að þessi eina glæra er  tekin úr samhengi. Umrædd glæra er notuð í tíma í stjórnmálafræði þar sem er verið að tala um stefnur og strauma í stjórnmáalfræði og birtingarmyndir til dæmis af þjóðernisstefnu. Sannarlega er þessi eina glæra, tekin úr samhengi, mjög klaufaleg. Mjög svo.

En það sem fram fer í kennslustundinni fjallar alls ekki um Sigmund Davíð á neinn neikvæðan hátt. Alls ekki.

Við þennan skóla starfa framúrskarandi kennarar eins og við aðra skóla og það er þannig í kennslu að þá er oft verið að setja hlutina í eitthvað samhengi, tengja við samtímann og taka dæmi og annað. Þessi eina glæra, eins og ég tók fram, er mjög klaufaleg ein og sér.

Hefur Guðrún Inga rætt við viðkomandi kennara um málið.

Ég er búin að eiga samtal við viðkomandi kennara og fara yfir í hvaða samhengi þetta var sett fram og afla mér uplýsinga og það sem fram fór í umræddum tíma semátti sér stað á síðasta skólaári eða árið þar á undan.

Ég skil vel að Sigmundi hafi sárnað. Ég skil það bara mjög vel. Það hefur verið sláandi að sá þetta.“

Guðrún Inga segir að hún muni setja sig í samband við Sigmund Davíð og ræða málið við hann.