„Það er herbergi hérna við hliðina, Margrét,“ sagði Barbara Björnsdóttir héraðsdómari við Margréti Friðriksdóttur, undir vitnaleiðslum í sakamáli Lögreglustjórans á höfuðborgarsvæðinu gegn Margréti, en aðalmeðferð í málinu fór fram í dag.
Margrét hefur verið ákærð fyrir hatursglæp vegna atviks sem átti sér stað fyrir utan veitingastaðinn Benzin Cafe, við Grensásveg, í ágúst árið 2018. Margrét viðurkennir að hafa veist að Semu Erlu með ókvæðisorðum þetta kvöld en að öðru leyti ber konunum engan veginn saman um atvikið.
Andrúmsloftið í dómsalnum var spennuþrungið, sérstaklega eftir að Sema Erla settist í vitnastól og gaf skýrslu. Sema Erla sakaði Margréti um áreiti en hún starði í augu hennar á meðan hún gaf vitni og fussaði yfir framburði hennar. Dómari bað Margréti um að hafa sig hæga og verjandi Margrétar, Arnar Þór Jónsson, sagði við hana: „Margrét, nú hefurðu þig hæga, það er ég sem tala þínu máli hér.“
Arnar gerði jafnframt athugasemd við að honum virtist að einhver væri að taka upp þinghaldið, sem er stranglega bannað. Benti hann á farsíma sem móðir Semu Erlu var með í höndunum en hún sagðist vera að senda vinkonu sinni skilaboð. Bauð hún Arnari og dómara að sjá síma sinn en það var ekki þegið og skýringar hennar teknar gildar. Sema Erla virtist miður sín og sagðist hún ekki eiga að þurfa að sitja undir „áreiti þessarar konu“.
Töluverðar tafir urðu á vitnaleiðslum vegna ásakana Semu um ögrandi framkomu Margrétar. Óskaði Sema eftir því að Margrét yfirgæfi salinn en svo fór ekki og lauk Sema við að gefa skýrslu.
Vitnisburðir Margrétar og Semu eru raktir hér.
